MZP buatsaihin Aijal Club-ah Mizoram leh Assam ramri chungchanga inrawnkhawmna nimin khan hman a ni a. He huna hian Political Party hrang hrang, Tlawmngai pawl te leh mimal ṭhahnemngai ṭhahnem tak an kal khawm a ni.
He huna hian Pu Vanlalngaia paper buatsaih, ‘Mizoram leh Assam ramri buai chhan’ te Pu C.Chawngkunga paper buatsaih, ‘Assam State leh Mizoram ramri-tunlai dinhmun’ tih leh Pu P.Lalupa paper buatsaih, ‘Mizoram leh Assam ramri buai hi engtia chinfel tur nge’ tih te chu ngaihthlaka, sawihona hun hman nghal a ni.
He huna thusawitu MZP President Pu Lalhmachhuana chuan, “Mizoram leh Assam ramri a buaina awm thin chu a pawi hle a, ramri a buaina leh harsatna a lo awm hian Mizo zawng zawng te ṭanrual a ngai a ni, a ti a. Mizoram leh Assam ramri buaina hi Politics a hamthat nan leh inbeihna atana hman chi a ni lova, Politics a inbeihna atana hman a nih chhung chuan a fel dawn lo tih sawiin, Mizo zawng zawng ten mahni awmna Party leh pawl te dahtha a thukhat vua a hma lakho loh chuan engtik ni ah mah a fel dawn lo a ni,” a ti.
He huna kalkhawm te hian resolution pathum an siam a, chungte chu – ‘Mizoram leh state dangte nen a inrina ramri veng him a, ramri hrula hmasawnna a awm theih nan leh kan ram chin humhalh a nih theih nan Boundary Development Cell/Wing din a nih theih nan chak lehzuala hmalak ho ni rawh se’ tih te, ‘Inner Line Forest Reserve Area Sq.miles 509, tuna Assam sawrkar hnuaia Cachar Forest Division in a enkawl mek hi a neitu dik tak Mizoram sawrkar Forest Department in a enkawl thuaina turin chak takin Mizoram Sorkar in hma la rawh se’ tih leh ‘Mizoram Sorkar in The Scheduled Caste and Scheduled Tribes(Prevention of Atrocities Act), 1989 hi a takin hmang nghal rawh se’ tih te a ni.