MNF High Command-in ‘Mipui thlavang hauhna kawngzawh’ neih ni se tih nimina National Executive Committe ah an rel. Meeting, MNF Sr. Vice President Pu Tawnluia kaihhruaia Aizawl MNF Hnam Runa nimina neihah he thutlukna hi siamin, Congress Sawrkar-in mipui te hrêk a, uchuak taka chhiah chi hrang hrang a tihsan duh lohna tun thla ni 22 hian neih ni se an ti a, ‘Zoram mipui thlavang hauhna kawngzawh’ tih vuahin Aizawl leh District khawpui tinah neih ni se, an ti.
Chief Ministerin Mizoram chu ramchhunga buhfai tlawmna ber nia a sawi chu, MNF chuan a finfiahin, thudiklo a ni an ti a, kan ṭhenawm state Arunachal Pradesh ah Rs.8. 30 Megalaya-ah Rs.12 a ni a, Tripura ah Rs.10.80 a ni an ti a, kum khat chhunga Mizoram mipui mamawh tawk hi quintal nuai 16 chuang hret a ni a, kum kalta 2013 – 2014 chhung kh an buhfai Quintal nuai 17 chuang lei niin, mamawh bak Kg. nuai 337 zet lei a ni tih sawiin, mamawh bak an leina chhan hi puanhnuai thil a awm em tih sawifiah se an duh tih an sawi.
National Executive Emergency Meeting hian resolution siamin, Congress sawrkarin buhfai man zaa 58-a tipunga Rs.15/- zeta a tisang te, Zoram chhiah; lei man zaa 55 a tisang te, thisen dahna ‘blood bag’ man Rs.550/-a lei a ngai ta te, tui leh electric bill namen lo va a tisang te, kohhran ho leh mipui duh loh zu zawrh an kaltlangpui te hi mipui zah lohna leh hmuhsitna lian tak a ni an ti a, Kumina Village Council leh Local Council lo awm tur hi MNF chuan phûr leh chak ngei turin veng leh khaw tinah hmachhawn a tum a. Party dang sangawizawnpui te nen a thawhho chu tualchhung Unit kutah ni se an ti a, Tunlai thi hna rapthlak pui pui thleng thin hi meeting chuan pawi a ti a. Chhiat tawk chhungkua te an tawrhpui a, pawi khawihtu te dân anga an phu tawk hremna lek ngei ni se an ti.