Nimin chawhma dar 11:00 khan Mizoram Journalists’ Association President Pu Vanlalrema Vantawl chuan ni 3 chhung (June 9-11,2015) awh tur India ram khawpui hrang hranga Mizo zirlai te infiamna ‘Inter State Mizo Students Summer Sports’ chu Zarkawt Basketball Court ah a hawng.
MJA President chuan, “Kan awmna ṭheuh aṭangin zirlai ten thil ṭha leh hmasawn-na engemaw tal Mizoram tan puakchhuah kan tum tur a ni a. Phaia kan awm chhan hi result ṭha tak neihna tur a ni tih kan hre reng tur a ni,” a ti.
MJA President chuan zirlaite chu an mawhphurhna hre thar tura chahin, “Zirlaite mawhphurhna chu taima taka lehkha zir anih avangin nasa taka tan in lak a pawimawh a. Kan thenawm state te central service ah an luh ruih ruih laiin kan state kan tlahniam zel hi a ngaimawhawm a, chuvangin zirlai ten tan in lak lehzual a tul a ni,” a ti bawk. Pu Vanlalrema chuan zirlaite chu an awmna hmun apiangah discipline ngai pawimawh tura chahin an chetzia leh incheina ah fimkhur turin a ti a. Hnam leh hnam intihbuai leh harsatna a awm pawhin remna palai hna thawk thin turin a chah bawk.
Tun ṭum Inter State Mizo Students Summer Sports hi a vawi 15-na niin state 12- Delhi, Pune, Kolkata, Bangalore, Jalandhar, Chandigarh, Chennai, Hyderabad, Imphal, Nagpur, Allahabad leh Shillong atangin zirlai thahnem tak an fuankhawm a. Inelna chi 5- Basketball, Football, Inkawi-bah, Spoon race leh Tug of War ah te inelna neih a ni ang.