Mizoram sawrkar-in state chhunga Maggi instant noddles hralh leh lakluh khap tura alo ruahman tawh chu Food Safety and Standard Authority of India (FSSAI) a thuthar ber zirchianga sawiho leh a nih hnuah ṭhulh rih a ni a, FSSAI-in ti tura a tih angin Maggi noodles chi 5 te chu lakkhawma Assama Food and Drug laboratory ah endik leh phawt a ni dawn.
Food and Drugs Administration Joint Director Pu Lalmalsawma sawi danin FSSAI-in Maggi chu hmun ṭhenkhatah him tawklo angin tarlang mahse an hriattirna thar berah hralh leh lakluh titawp nghal tura tihna tel lova endik leh phawt tura a tih avangin ṭhulh rih a ni leh ta a, a hma a tarlan dan chuan nimin hi ‘Order’ tihchhuah ni tura ruahman a ni na in, Food Safety Commissioner, Dr K Ropari te nen sawiho leh a nih hnuah Maggi te hi endik leh rih tura kalpui a ni leh rih dawn ta a ni.
Dr. K. Ropari, Health Department Principal Director chuan, Nestle Company-in state tina Maggi Noodles distributor te hnena Maggi Noodles an lak tawh thawnkir tura a tihna thupek, ngun taka vil tura tihna erawh chu sawrkar laipui aṭanga an dawn avangin Maggi Noodles distributor-te’n he thupek an bawhzui dan hi an enfiah dawn niin a sawi a, Distributor ten Maggi an thawn let dan chu an vil reng dawn tih a sawi.
Aizawla Maggi Distributor 4-te chuan, Maggi Noodles chu mipuiin an duh avangin a hralh chak hle niin an sawi a, Nestle Company siam tho, Maggi Noodles ni lo, Maggi dangte chu company in la kir turin a hriattir lo niin an sawi bawk.
Hetihlai hian sorkar laipuia Central food safety regulator, FSSAI chuan noodle, pasta and macaroni brand hrang hrang, company 7 siam- Top Ramen, Foodle leh Wai Wai, te chu a him leh him loh enfiah turin thupek a chhuah a, Maggi Nutilicious Pazzta pawh a taste maker nen endik turin a ti bawk.
FSSAI state tin leh UT zawng zawnga Commissioner, Food Safety te he hriattirna zawm tur hian a ti a, tun thla ni 19 hma ngeia report hmu let turin a ti a ni.