MP te’n an bial chhunga Model Village an thlan hnu-a Model Village siam tura hmalakna chi hrang hrang kalpui mekah Mizoram leh Chhattisgarh state te chu tun dinhmuna hmala ṭha ber an ni.
Rural Development Department hotute sawi danin, Model Village ti a hriat lar Sansad Adarsh Gram Yojana(SAGY) hi thla tinin Delhi- ah thlirhona neih ṭhin a ni a. Tunhnaia thirhona hnuhnung berah Mizoram leh Chhattisgarh chu tun dinhmuna kalpui ṭha bera puan an ni a, department hrang hrang te’n thil chi hrang hranga hma an lak hnuah tun dinhmunah MP (Rajya Sabha) Pu Ronald Sapa Tlau thlan Chhiahtlang leh Lok Sabha MP Pu CL Ruala thlan Khawlailung model village te tan hian Village Development Plan siam zawh tawh a ni.
Rural Development hmalak-na chungchangah department hotute chuan Ni za inhlawhna bikah ni 2 inhlawhna dawn a nih hnu-ah district tinah thawh tir an ni tawh a, kumin sawrkar kum chhunga inhlawhna tur ni 79 pawm tawh-ah ni 77 inhlawh leh na tur chu dawn thuai beisei a ni. Kumin atan hian Border Area Development Program (BADP) atan kum hmasa ami zat vaibelchhe 38 leh nuai 62 chu pawm tawh a ni a. BRGF erawh tihtawp a nih avangin hemi avang hian hmun thenkhatah hnathawh lai tlem azawng harsatna tawk an awm theih thu RD hotute chuan an sawi a. Mirethei Insak tanpuina Indira Awas Yojana (IAY) atan pawh nikum sawrkar kum ami zat tho chenna in 1,293 sak theihna tur cheng nuai 610 leh sing riat pawm tawh niin sum erawh dawn a la ni rih lo niin an sawi a ni.