Nimin khan Chief Minister Pu Lal Thanhawla hovin NEDP Core Committee chu Chief Minister Office Conference Room-ah meeting pawimawh takin neiin an ṭhukhawm a, kum kaltaa NEDP hmalakna te an thlirho a, tun sawrkar kum 2017-18 atana hmalak tur ruahmanna (Action Plan) an sawiho hnuin an pawmpui a ni.
Chief Minister chuan meeting-a thuhma a sawinaah NEDP chu sawrkar flagship programme a nih angin NLUP ang thovin NEDP-ah pawh hian mipui a bik takin zokhaw lama cheng ten beiseina sang tak an nei a, kuthnathawktu te, huan neitute leh loneitute chawikan nan leh hmasawnna rualkhai zawk leh chak zawk a awm thei nan a ṭangkai ber leh a ṭha thei ang bera duan leh hman tum a ni tih a sawi a, a hlawhtlinna chu a beneficiary-te kutah awm mahse anmahni kaihruaia kawng kawhhmuh turin sawrkar hnathawk leh line department-te an pawimawh a, neitu rilru pu a beneficiary te hmalak puina kawnga sawrkar hnathawk te chu a nawr kaltu (driving force) an nih thu a sawi a. Beneficiary-te ṭanpui turin leh ṭha zawka hma an lak theih nan, a endik leh enthlakna lamah evaluation, monitoring leh social audit thlenga hmalak a tul tih thu a sawi. Mizoramin remchanna hrang hrang a neih ṭhat dante sawiin Chief Minister chuan kan ṭan tlan a, theihtawp kan chhuah chuan India ramah Model State kan ni thei a ni, a ti.
Sawrkar kum kalta 2016-17 a NEDP hnuaia hmalakna te chu meeting chuan thlir hovin ruahmanna siam te chu a kalpui dan a ṭha tawk tih an sawi a, NEDP-in a huam zau avangin ruahmanna te chak zawka kalpui a nih theih nan a kalpui dan implementation mechanism ṭha tak duanna kawnga Committee siam chu ṭha an tih thu meeting-ah hian sawilan a ni a, tun sawrkar kum kal mek 2017-18 atana NEDP Action Plan Department 15 aṭanga thehluh te chu meeting-ah hian sawiho a nih hnuin pawm a ni.
United Nations Development Programme (UNDP) aiawhten NEDP-in zokhaw lama mipuite a huam zau zawk nan leh anmahni tana hlawk zawka kalpui a nih theih nana Village Level Development Programme an ruahman chu meeting-ah hian tarlangin a sawizauna an nei a. Meeting chuan UNDP ruahmanna chu ṭha tiin kalpui turin hma lak nise an ti a, UNDP puihnaa buatsaih Procurement Handbook for Goods, Services & Civil Works chu Core Committee ah hian pharh niin hman tura pawm a ni a, Chief Secretary kaihhruaina hnuaia din Committee on Land Reforms chu July thla chhunga an Report thehlut turin an ti.
NEDP hian ram hmasawn-na atan a hnathawh dan ṭha zawk kawng kawhhmuhna leh hlawk zawka thawh dan tur ruahmanna te, infrastructure leh assets kan neih mek hlâwk zawka hman leh enkawl dan mumal tak ruahmanna tur te, sawrkar sum dinhmun siam ṭhat-na leh dik leh fel zawka hman dan tur ruahmanna te, Mizoram chhunga sumdawnna leh thil tharchhuah hlawk taka kalpui a nih theih nana ruahman te, mipui te tana sawrkar rawng-bawlna leh hnathawh chak zawk leh daihzai zawka siam tura ruahmanna te, Mizo mipuiten thiamna tak tak eizawnna tlak an neih theih nana hmalak te, sik leh sa inthlak danglam nasa lutuk atanga chhiatna thleng thei laka invenna leh sawrkar hnathawh dan leh hnathawk te hlawk leh inrenchem zawka kalpui a nih theihnan a rua-hmanna siam te hi a huam vek a, hetiang taka huam zau leh economy a nghawng (impact) nei lian tur anih avang hian NEDP hi Comprehensive Growth Strategy tih a ni.
Kumin 2017-18 ah hian NEDP atan hian cheng nuai 75000 ruahman a ni.