Kangmei vengṭha lawmman pathumna Serchhip District-in a dawng
SERCHHIP: Nimin khan Mizoram puma Green Mizoram Day 2017 hman a nih rualin Serchhip-ah pawh District Green Mizoram Committee ruahmannain hman a ni a, kum 2015 Green Mizoram Day-a Department leh tlawmngaipawl hrang hrangten thing an lo phun tawh – Zawlpui kawnga mi chu an samfaiin a ṭul angin an phun belh.
Thingphun hawnna inkhawm tawi, Zawlpui peng ṭhuama neihah District Bawrhsap Pi Sangchhin Chinzah chuan thusawiin, he ram hmalam hun hi vawiina mite kutah a innghat a, kan tu leh fate tana chen zui zêlna tlâk, chhuan tam tak lo la awm zel turte ngaihtuah chunga kan enkawl a ṭul a ni, a ti.
District Bawrhsap hian he pengṭhuamah hian Day hawn nan thing a phun nghal a, chumi zawhah kumina District chhunga kangmei venna kawnga thawk ṭha khuate hnenah lawmman a hlan nghal bawk.
Kumina Serchhip District chhunga kangmei ven kawnga thawk ṭha ber chu Bungtlang niin, pahnihna Sialhau leh pathumna Thenzawl East village Council te an ni.
A hawnna hun tawi neih zawh hian Department hrang hrangte chuan an chanpual ṭheuhva kum hmasa lama an lo phun tawh thing te an sâm fai a, hung la ngaite hungin, phun belh ngaite an phun belh bawk a. Hemi atana hmanraw mamawh zawng zawngte hi Nodal Deparment, Environment, Forest & Climate Change Department ten an ngaihtuah sak vek a ni.
Hetianga Department hrang hrangten thingphunna lama hun an hman lai hian Office zawng zawngte chu a ṭul anga mipui tana dawr theihin an inhawng vek tho a ni.
Green Mizoram Day 2017 hmanna pui ber chu Chief Minister Pu Lal Thanhawla, Chairman, State Level Committee on Green Mizoram ni bawk hovin nimin zing khan Chite Lui Kam, Ramthar leh Thuampui inkar Lei bulah hman a ni a, he hunah hian Chief Minister chuan kangmei venna kawnga District tiṭha te leh Aizawl District huam chhunga mei kawng sial a khaw ti tha te ber te hnenah lawmman a hlan a, Kangmei venna kawnga tiṭha ber District chu Kolasib District niin, pahnihna chu Lunglei District an ni a, pathumna chu Sechhip District a ni a, District tiṭha ber hian lawmman Rs.50,000 bakah thuziak leh Khitea Running Trophy an dawng a, pahnihna Lunglei District hian Rs.30,000/- leh thuziak dawngin, pathumna Serchhip District hian Rs.20,000/- leh thuziak an dawng a, Serchhip District lawmman dawn hi District Bawrhsap aiawhin E.Lungdar BDO Pu Vanlal-ṭanpuia’n a dawng a ni.
Report a tarlan danin Green Mizoram Day hman ṭan 1999 aṭanga 2016 thleng khan thing ṭiak 36,58,174 phun a ni tawh a. Kum 2013 aṭang hian thingphun te a nung zui em tih chhinchhiah ṭan a ni a. Kum 2013 a thing ṭiak 72,241 phun atangin za zelah 62 chu a nung a; 2014-a 98,632 phun aṭangin za zelah 58 a nung a; 2015 a thing ṭiak 81,233 phun aṭangin za zelah 70.53 a nung a, 2016 a thing tiak 1,23, 405 aṭangin za zelah 81.06 a nung a ni.