Serchhip District VC-in Kolasib JAC dem

Serchhip District Village Council Association chuan Kolasib JAC-ten National Highway 54 an dangchat chu an dem thu an sawi.
Serchhip District Village Council Association Executive chu nimin khan Hmar Veng YMA Hall-ah ṭhukhawmin Kolasib JAC an dem thu hi resolution pass-in an tarlang a, an resolution-ah chuan “Dr. Zothansanga Zadeng, Surgeon, Kolasib District Hospital aṭanga Serchhip District Hospital-a transfer remti lova Kolasib JAC ten Mizoram châk lâkna leh eibar lâkluhna pui ber NH-54 kawngpui an dangchat hi kan dem a, Kolasib District chhim lam mipuite ngaih-thahna leh palzutna lian takah kan ngai a ni. Hetihrual hian a chhawrtu Mizoram sawrkarin ṭul a tihna apiangah Doctor te hi ṭha taka an chhuah theih nana ngaihtuahna hmang thar leh turin Kolasib JAC te kan phut a ni,” tiin an sawi.

Serchhip District VC Association Executive Meeting hi an President Pu T.Zabiaka’n kaihruaiin, an thurel zingah Mizoram Village Council awm mek hi ṭhiatin tualchhung rorelnain hma a sawn theih nan sawrkarin Panchayati Raj System kalpui ve tawh se tih te, Serchhip District-a Officer-ten mipui tana ṭha zawka hna an thawh theih nan hna dang kawp lova thawk turin thuneitute hnenah thlen nise an ti bawk.

Hei bakah hian New Ser-chhip BRTF hmun hluia PWD SE Office building sak peih vek tawh hnua luah lova awm reng leh he Office hi khaw danga sawn leh tumna awma an hriat chu zir chiangin, SE Office ṭha tak Serchhipa kalpui a nih theih nan leh PWD Quarters sak zawh tawh a nihna tur anga hman ṭangkai a nih theih nan hmalak nise tih te an pass a ni.

Serchhip District chhung inkalpawhna kawng siamṭhat a nih theih nan a ṭul anga hma la-in hmalakna tur ṭul bik hria VC te chuan District VC hruai-tute hnenah thlenin, bawhzui-sak nise tih te an rel a, an pawl member boral an awmin Rs.20,000/-a inrel ṭhin nise, heta tan hian VC tinin Rs.500/- ṭheuh thawhkhawm nise an ti a, District VC Fund atan Rs.1,500- ṭheuh Serchhip District-a VC tinin thawhkhawm nise an ti bawk.