Thawhṭanni khan Champhai District Melbukah Rangkachak Kg 20 man a ni.
Central Land Customs hotute sawi danin, rangkachak hi Central Land Customs te hian an thudawn bawhzuia an chhui zuinaah Thawhṭanni chawhnu lam khan Melbukah an man a, a lo kawltu Lalpekhlua (19), Zokhawthar khua nia inchhal pawh an man nghal a. Lalpekhlua hian rangkachak hi Myanmar Kalay khuaa mi Tangya-a ta, Aizawl thleng Rs.30,000/- hlawha a kensak a nih thu a sawi a, Lalpekhlua hi niminpiah khan Court-ah hruaiin Champhai District Jail-ah dahluh nghal a ni.
Central Customs-te’n an man tak Rangkachak Kg 20 hi sawrkarin a rate a siam ang chu Cheng Nuai 598 man a ni a, tualchhunga an hralhna ang rate chuan Cheng Vbch 7.23 chuang man a ni thung.