Tlabung Forest Department enkawl lai plantation huamchhunga teak kih ruk, Bangladesh lama hralh tura Khawthlangtuipui kaltlanga tawlh chhuah ṭhin chu tihtawp tumin department-ten tunlai hian hma an la mek a, kumin chhungin dan loa teak hmanga sumdawnnaa inhnamhnawih ni ngeia hriat mi 40 chuang an man tawh a ni.
Tlabunga Forest department hotute chuan, dan bawhchhia an mante chu an phu tawk hremna pek an nih thin thu leh, tangkafai an chawitir lohte pawh lungina tantir an nih ṭhin thu an sawi a, hetianga dan bawhchhiaa sumdawnna kaihhnawiha an man mi 5-ten court thubuai an neih mek thu an sawi bawk.
Tlabunga Divisional Forest Officer Pu Lalṭanpuia Pachuau chuan, teak kit ru-a dan loa hralh leh ṭhintute hian, a tirah lui kam hnaiha protected area-a teak kung an kit deuh ber ṭhin tih a sawi a, nimahsela teak hmanga dan loa sumdawngte hian department ram bakah, hmun remchang lai apianga mimal huana teak thlengin hralh atan an kit ṭhin tawh niin a sawi.