Categories
Chanchinthar Hriselna leh Damdawi Mizoram

Minister hovin MSACS Governing Body ṭhukhawm

Nimin khan Chief Minister’s Conference Hall-ah Health Minister Pu Lal Thanzara hovin Mizoram State AIDS Control Society (MSACS) Governing Body meeting neih a ni.

Health Minister Pu Lal Thanzara chuan HIV/AIDS dona kawngah MSACS leh tlawmngai pawl hrang hrang te thawhhona ṭha tak neih a pawimawh thu a sawi a, MSACS Project Director Dr. Lalmalsawmi Sailo chuan kum kalta 2016-2017 chhunga MSACS hmalakna hrang hrang a tarlang a, chung zingah chuan HIV / AIDS darh zel tur venna atan Targetted Intervention (TI) chu hmanraw ṭangkai a nih thu sawiin, Targeted Intervention hnuaia Link Worker Scheme-ah Tlawmngai Pawl (NGO) te nen thawhhona neiin thingtlang khua, motor luh theihlohna thlengin high risk group-te hmuhchhuah an nih bakah inentirna hun ṭha siamsak an nih thu a sawi.

Meeting-ah chuan kum 2016-2017 chhunga hmachhawpte leh target hlen a nih dan sawiho a ni a, kum 2014-2017 chhunga National AIDS Control Organisation (NACO) aṭanga sum hmuh leh hman dan tarlan niin, heng an sum hmuhte hi kumtin a hma aiin tlêm mahse hmasawnna hmuh zel a nih thu meeting-ah chuan tarlan a ni.

Meeting chuan MSACS office changtlung lehzual neih a nih theih nan office thar sakna tur hmun zawn nise tiin a rel a, tlawmngai pawl Women Anti Drug Association (WADA) Lunglei te’n Targeted Intervention Siaha District-ah kalpui tawh tura rel niin, audit report pahnih Statutory leh Internal pawm a ni a, High Risk Group-te tan a thlawna inentirna Rogi Kalyan Samiti (RKS) hnuaia kalpui tur chungchang erawh Commi-ssioner & Secretary , Health & Family Welfare ennawn leh zirchiang tura rel a ni.

Meeting-ah hian Health & Family Welfare, Finance, Central YMA, Indian Medical Association (IMA), AIR Aizawl, Social Welfare, Information & Public Relations, Directorate of Health Services, National Health Mission, Hospital & Medical Education, Planning, School Education , Higher & Technical Education hotute an tel a ni.

By Editor

C.Lalrochhuanga,
New Serchhip, Serchhip - 796181
Mizoram
Contact: WhatsApp | Phone Call | Telegram