Human Resources Development Board Vice Chairman Prof. L. Thang-mawia chuan FEMSE-in nawrh an huaihawt chungchangah sawrkarin an thil ngiat engmah a la dawng lo niin a sawi a, hetihrual hian Samagra Shiksha, Mizoram State Project Director Lalhmachhuana chuan thupek chhuahin, sawrkar thu angin, Samagra Shiksha, Mizoram hnuaia thawk mek, zirtirtute leh thawktu dang, chawlh la mekte chu vawiin, November ni 25 aṭanga an hna chhunzawm vek turin a hriattir a, thupek zawm lo te chu an chungah action lak a ni dawn tih a chhuah bawk.
Federation of Mizoram Samagra Employees (FEMSE) chuan sawrkara an thil phûtte a hlawhtlinna an la hmuhloh avangin kar kalta Ningani aṭang khan Mass Casual leave la-in an chawl ṭan a, sawrkar zirna leh pisa 600 chuang chu hnathawk theilo inkhar niin thudawn a ni.
Human Resources Development Board Vice Chairman Prof. L.Thangmawia chuan FEMSE member-te’n sawrkar laka an thil phut nawr na’na chawlh an lak chungchangah Inrinni khan chanchinbumite kâwmin FEMSE aṭang hian Ministry chuan official-in eng thu mah an dawn loh thu a sawi a. SSA leh RMSA-te Sama-gran Shisha-a chhunfin an nih hnuin thawktute hlawh chu central lam hian a hma aiin an rawn titlêm niin a sawi a. An hlawh tur za zela 10 a lo do vena bakah an hlawh zât an lak theih na’n kum khatah Mizoram sawrkarin cheng Vaibelchhe 27 a sen belh mek thu a sawi a. Sawrkarin zirna a ngaih pawi-mawh avangin Education Minister-in theihtawp chhuahin Central lamin sum an rawn pek tlai ṭum pawhin state sawrkar sum lo hmang hawhin Mizo-ram sawrkarin hlawh an lak theihna turin hma a lak sak zawk niin a sawi a ni.
FEMSE hruaituten nawrh an huaihawt mekah hian sawrkar chuan thawk lo chuan hlawh nei lo rawh se tih thupui a kalpui dawn tih a sawi bawk a. Sikul lam thuneitute hnenah pawh zirtirtu kal leh kal lo nitina report tura hriattir an nih thu pawh a sawi a. FEMSE-in Mizoram sawrkara an thil phûtte School Education Department changtu Minister-ah emaw, Chief Minister hnenah emaw an la thlen lova. Thlen pawh nise tun dinhmunah SSA (Elementary)-te hian Mizoram sawrkar chu an service chungchangah Gauhati High Court Aizawl Bench ah an khing mek a. Court thu kal lai a nih avangin court-in a relfel hma chuan an chung-chang thu a hmalakna kal mek pawh sawrkar tan thutlukna engmah siam theih a la ni rih lo niin a sawi.
Human Resources Development Board Vice Chairman chuan sawrkarin zirlai pawisawi lote hmakhua ngaiin FEMSE-ten nawrhna an kalpui mek chu tihtawp nise a duh takzet tih sawiin, November ni 25 (vawiin) aṭang hian an hna chhunzawm vek turin zirtirtu zawng zawngte a hriattir nghal a. Sawrkar hriattirna zawm lote chungah a ṭul ang zelin hremna kenkawh a ni dawn tih a sawi bawk a ni. Mizoram sawrkar chuan FEMSE lungawilohna leh an harsatna te chu an hriatthiampui thu sawi langin, an chungchang chu tihfel thut theih loh, hun rei deuh ngai chi a nih avangin sawrkar dinhmun hrethiama lungawilohna an neih mekte chu titawp turin a beisei tih a sawi a ni.
FEMSE thuchhuahin a tarlan danin, sawrkara an dilna thlente sawrkarin a ngaihsak loh avang leh thu lawmawm an la hriat loh avangin November ni 25-ah pawh Mass Casual Leave lak chhunzawm zel an tum tih an sawi a, hetihlai hian Samagra Shiksha, Mizoram chuan thupek chhuahin, an hnuaia thawktu chawlh la zawng zawngte chu November ni 25 zing, hna ṭan hun pangngaia an hna zawm vek turin a hriattir a, thupek zawm lote chu an chungah action lak anih tur thu an chhuah thung a ni.
FEMSE member te hi Primary School zirtirtu – 550, Middle School zirtirtu – 1643 an nih bakah High School – 93 leh HSS – 6 a thawk mek te an ni.
MZP chuan Mizoram chhunga zirna in hrang hranga zirlaite exam tura an inpuahchah lai leh ṭhenkhat exam mek an awm lai a zirlaite rilru tibuai thei leh an zirna-in a tawrh theihna tur zawnga thil tih awm reng reng chu MZP chuan a rem ti ngai lo tiin, FEMSE te nawrhna leh thil phutte chu zirlaite’n an tawrh chhunzawm zel lohna turin thuneitute pawhin a chinfel hna thawk a, FEMSE hruaitute nena sawihona nei thuai turin a ngen nghal bawk a ni.