Integration Camp hawng

Ni nga awh tur National Integration Camp chu nimin khan Aizawla Youth Hostel-ah Sports & Youth Services Minister Robert Romawia Royte chuan a hawng.

Sawrkar laipuia Ministry of Culture hnuaia East Zonal Cultural centre leh Ministry of Youth Affairs & Sports hnuaia Nehru Yuva Kendra Sangathan (NYKS), Mizoram ṭangkawp buatsaih a ni a, Colonel Biplav Tripathi, Commanding Officer, 46 Assam Rifles leh BOG NYKS Delhi Madhavi Agarwal ten an hmanpui a ni.

India ram state hrang hrang 12 aṭanga ṭhalai rual pungkawm hmaah thu sawiin ṭRobert Romawia Royte chuan State hrang hrang atanga lokalte chu Mizorama an cham chhungin a tam thei ang bera Mizoram nawmna leh mawina, danglam bikna te zirchhuak a, an ṭhian dangte pawh hrilh ve tura sawmin India hmarchhak leh India ram chhung ril zawk ten inpawmtawn leh inhriatpawh tawn an mamawh tih a sawi a, India ram mawina leh ropuina hnam hrang hrang leh tawng hrang hrang hmangte nun-phung leh zia rang hrang hrang inzir tawn leh in ngaihhlut sak tawn thei a awm chu a vanneih thlak hle a ni a ti bawk. Mizo-ramin “Fit Mizoram Movement” a kalpui dan sawiin hnam hrisel leh in fit ten hmasawnna an thleng nasa bik a ni a ti a ni.

National Integration Camp ah hian India ram state 12 aṭang thalai 300 rual an tel a, Camp neih chhungin cultural programme hrang hrang neih a ni dawn a, Constitution day lawmna leh Constitution rally te neih a ni ang.