MNF President leh Chief Minister ni bawk Pu Zoramthanga chuan thusawiin, sorkar-in zu a khap chungchangah rin thu leh thil dang mi ?henkhatin an bawlphuan nasa hle tih a sawi a. “A zu zuar chi chuan kan kal dawn lo hrim hrim, zu kan khap tlat dawn,” a ti.
Nimina Aizawl-a MNF party office Mizo Hnam Runa kum thar atana hawnna leh inhlan tharna hun hmannaah Chief Minister chuan he thu hi a sawi a, Chief Minister chuan, “Zu khapna dan duan mekah rawtna hrang hrang a awm a. Dân hmasa lama lo awm tawh, zupui leh zufang ang chite Kût nia entira pholante a ṭha em, tihte rawtna a awm a. Inrâwntawnna kalpui mek a nih laiin zu zuar leh tur ang lek leka sawina a awm a ni. Zu hi kan khap tlat dawn a, zu khapna dân hi a ṭul angin Kohhran leh midang dangte nen inrâwntawnin a ṭul ang zela kalpui a ni ang,” a ti.
MNF president chuan Pathianin MNF Party a tivul mek tih a sawi a, “Zoram leh Zofate pâr vul hun a thleng mek,” tih a sawi a, hnam thinlung pu zawng zawngte MNF-a lawilût zel turin a sawm a. India hmarchaka remna leh muanna a awm theih nana hmanruaah India sawrkar chuan Zoram leh a Chief Minister a mamawh a, hmalak mek a nih thu leh hmachhawp ṭhahnem tak a awm thu a sawi bawk a ni.
Lok Sabha MP C.Lalrosanga pawhin thusawiin, beihna leh diriamna a tawh laiin support-tu leh ṭawngṭaipuitu tam tak a nei tih a hriat thu leh lawmawm a tih thu a sawi a. “Parliament Committee peng pahnih pathumah Committee member turin min dah ve a. Coal & Steel lamah member ka nih ve angin kan ramah hetiang lama hmalakna tur awm hria chuan thurawn min pe turin ka ngen che u a ni,” a ti.
C.Lalrosanga chuan, “North East tana Central Budget 10% dah, vaibelchhe tam tak hman lovin a awm a. Hemi chungchang hi hmarchhak MP rual pawhin kan sawikhawm tawh a, tin, Union Finance Minister Nirmala Sitharaman hnenah pawh hemi chung-chang hi kan sawi a, hmalak a tum thu a sawi a ni,” a ti a. Lok Sabha MP chuan, “Pathianin he kan ram hi min siam a tum a, min thlahthlam dawn lo,” a ti bawk.
He hunah hian Congress Party-a General Secretary lo ni tawh ṭhin Prof LH Chhuan-awma chu MNF party-ah lawmluh a ni a, K.Vanlalauva, Treasurer kaihhruai inkhawm-ah hian mahni inhlan tharna leh dik tak leh fel taka rorelna kalpui a nih theih nan ṭawngṭai rualna hun hman a ni a, Martar-te hriatrengna leh sunna hun hman a ni bawk.