Categories
Chanchinthar Mizoram

Kumthar thingpui inhona leh member thar lakluhna hun hmang

Mizoram Journalists’ Association (MJA) Gen. Hqrs. chuan kumtina a tih ṭhin angin kumthar, 2020 atan nimin khan kumthar thingpui in-hona inkhawm a hmang a. Tunhnaia MJA member laktharte lawmluh an ni bakah Press Tour-a telte zin report pek ngaihthlak a ni bawk.

He huna thu sawitu MJA president Zonunsanga Khiangte chuan kum 1972-a MJA a din aṭangin Pathian hruaina a dawng nasa a, kan hna-te rim taka thawh a ngai chungin, hriselna ṭha kan nei thei chu Pathian awmpuina a ni, a ti a. Journalist-te leh MJA-ten a ṭha lam zawngin hma an sawn nasa hle tiin, hriselna ṭha neia ṭha taka kan hna kan thawh theih nan nun uluk a pawimawh tih a sawi.

Press tour chungchangah kum 2019 chhung khan MJA chanchina press tour-a la chhuah tam ber tum ni turin Press Tour ṭum 8 neih a nih thu leh hemi kal zelah kumin January leh February hian team khat ve ve dang chhuak tura ruahman a ni tih sawiin, Mizoram sawrkar a bikin chief minister Zoramthanga leh I&PR minister Lalruatkima ten kawng an ngaihtuahsak avangin MJA an lawm hle tih a sawi.

MJA general conference-a an lo rel tawh, sawrkar advertisement rate hmanlai tisang tura ngenna pawh bawhzui niin, rate tihsanna tur hi sawrkarin a tichhuak hnai nia an hriat thu MJA president hian a sawi a. Journalist Retirement Scheme tih puitlinna tura buaipui mek pawh sawrkarin a ngaihtuah tura a din Committee chuan an hrualmum hnai nia an hriat thu a sawi bawk.

MJA kumthar inkhawm hi vice president Lalremsiama’n a kaihruai a, an senior member C.Lalzamlova, executive member-in hunserh hmangin kumin January 6-12 inkara Mizoram sawrkar ruahmannaa Benga-luru leh Mysuru-a Press Study Tour neite aiawhin team leader C.Lalhmachhuana, MJA treasurer leh team member dang-ten an zin report an pe a ni.

Hei bakah hian MJA executive meeting-in MJA member atana a lak thar mi 6-te lawmluhna MJA president Pu Zonunsanga Khiangte hian a nei nghal a ni.

By Editor

C.Lalrochhuanga,
New Serchhip, Serchhip - 796181
Mizoram
Contact: WhatsApp | Phone Call | Telegram

Leave a Reply

This site uses Akismet to reduce spam. Learn how your comment data is processed.