Categories
Chanchinthar Mizoram

Tlungvela tlawmngai pawl-ten Tlungvel Solar Plant hnathawh mek an chawlhtir rih

Tlungvel Solar Plant-a Power siamchhuah chu Tlungvel khuain Direct-in a hmang dawn lo nia an hriat avangin Tlungvel All NGO’s chuan an khaw ram chhunga bun, Solar Plant hnathawh mekte chawlh tirin Main Gate ah hnathawktute an dang.

Kum 2018-a hnathawh ṭan, Tlungvel, Khawkum ram a 2 Mega watt Solar Power Plant chu hnathawh zawh ṭep tawh a ni a. Nimin khan Test charge hna ZEDA lamin thawh an tum nia hriain Tlungvel All NGO’s te chuan Tlungvel-in Direct-a a chhawr theih tura hmalakna awm lo nia hriain nimin khan hna kallai thawk chhunzawm tawh lo turin an ti a ni.

Tlungvel tlawmngai pawl intelkhawm chuan Solar Plant atana an khaw ram ṭha lai ber, Khawkum ram an pekah an khuain Direct-a an chhawr theih ngei an duh tih an sawi a. Chumi tur chuan Solar Plant lungphum ni, kum 2018 December ni 21-ah Power & Electricity Department hotute pawhin 11Kv line-ah Tlungvel bik châwm turin power pek an nih tur thu an sawi niin an sawi a, hmalakna kal chho zelah tihhlawhtlin tumna a awmlo tih an hriat avangin hetiang hian an che chhuak ta tih an sawi.

All NGO’s te chuan resolution pass-in, P&E Minister leh Power Secretary-ten an tiam ang a, Tlungvelin direct-a an chhawr theih tura hmalakna, March 2020 thlenga a awm loh chuan he solar plant hi hmun dangah sawrkarin sawn chhuak mai se an ti a, an duh anga hmalakna a awm hma chu hnathawh lai pawh chhunzawm an rem ti lo tih an sawi.

By Editor

C.Lalrochhuanga,
New Serchhip, Serchhip - 796181
Mizoram
Contact: WhatsApp | Phone Call | Telegram