Health Minister-in MJA health check up neih tur hawng

Civil Hospital Aizawl-in Mizoram Journalists’ Association Gen. Hqrs member-te tana free health check up a buatsaih tur chu nimin khan Health & Family Welfare minister Dr R Lalthangliana’n a hawng.

Civil Hospital Aizawl Doctors’ Seminar Room-a inkhawm buatsaihah Health minister chuan hriselna ngai pawimawha hetiang hun MJA leh Civil Hospital Aizawl-ten an nei chu thil ṭha, health awareness lama mipuite pawh tiṭhang harhtu tur a nih a rin thu a sawi a. Tuna kum khat dana tih chu kumtin neih tura ruahman a ṭha, tiin, MJA awmna district dang zawngah pawh free health checkup hi nei vek turin directorate lamin hma lo la se rah ṭha tak a chhuah a beisei thu a sawi.

CHA hi a awmna laili avangin pan hlawh ber a ni a, tihchangtlun erawh a ngai dawn tiin minister hian a sawi a. Trauma Centre dinna tur sawrkarin cheng vaibelchhe 5 dah a nih tawh thu leh a ṭul dan a zirin dah belh zel a nih tur thu a sawi a. Hospital ram tlak lam âwl chu doctor nurse leh 4th grade awmna tur quarters sakna atan ngaihtuah a ni dawn tih a sawi bawk.

ICU tlem lutuk chu tihbelh dan tur dap a nih thu te, Zemabawk Cancer Hospital-a inhemna khawl kum 20 a upa ni tawh chu chief minister hmalakna in cheng vbch. 14 in khawl thar lei tum mek a nih thu leh a dahna tur hmun pawh thawmthat a nih thute, Cancer Speciality Hospital din tura ruahman fel a nih tawh thu leh RIPANS tihchangtlunna tur vbch.480 tihfel a nih tawh thute a sawi bawk

MJA president Zonunsanga Khiangte chuan journalist ṭha ni turin hrisel a ngai tih a sawi a, chumi atana CHA-in duhsak taka health checkup an neihsak ṭhin chu lawmawm a tih thu a sawi a. ACH chu journalist ten an intatu hle, tih sawiin, ṭha taka thawhho zel an duh thu a sawi a ni.
CHA medical superintendent Dr Lalhmuchhuaka chuan CHA chu ISO mai ni lo central team-in an ngaih pawimawh tel em em NQAS certified hospital a ni tel tih sawiin, recertification turin hma an la mek tih a sawi a, CHA chu khum 100 dang dah belhin khum 300 turin ruahman mek a nih thute, dental leh department dang pawh tihchangtlun mek a nih thu a sawi.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram