MSU-in kum 2017-a an hruaitute court case siamsak chinfelsak thuai turin sawrkar an phût

Mizo Students’ Union General Headquarters, Aizawl leh ACCJSU chuan kum 2017, September ni 26-a, Chawngte Higher Secondary School-a, Mizo zirlai, Chakma-ten kut an thlak chungchangah MSU-in Mizo zirlaite thlavang a hauh avanga sawrkarin MSU hruaitute court case an siamsak chu chinfelsak thuai turin sawrkar an phut tih an sawi.

Nimina Aizawl Press Club-a MSU hruaituten thuthar lakhawmtute an kawmnaah MSU President Vanlalliana Khiangte chuan kum 2017-a thil thleng chungchangah hian MSU-in he thil a hriat veleh Chakma House, Liasion Officer chu thil awmzia zawhfiah tumin a Office-ah a len chilh nghal a, eng thil mah sawifiah tur a hriat loh avangin Mizo zirlaite thlavang hauh nan Chakma House chu mikhual thleng rih lo se a ṭhat zawk tur thu MSU hruaitute hian an hrilh a, MSU hruaitute thil awmzia zawtfiaha Chakma House LO an hmuh chungchangah, LO hian Vaivakawn PS-ah FIR a thehlut a, MSU hruaitute hian thiamlohna an neih lohzia lantir nan leh khatih hunlaia Aizawl SP ngenna angin Vaivakawn PS-ah, MSU OB paruk te chu an inpe a ni.

He buaina kal zelah hian khatihlaia Minister C.Ngun-lianchunga Office-ah MSU hruaitute leh Chakma hruaitu ṭhenkhat ten inkawmhona neiin, resolution pawh pass a ni a. Inrem taka an awm tawh dawn emaw an tih laia, MSU hruaitute laka Chakma House LO-in FIR a thehluh chu hnukkir lo leh titawp lova, tun thlenga case kalpui a ni chu MSU chuan a hrethiam lo tih an sawi a. He case hi chinfel a nih loh chuan Chakma house chu vawiin aṭangin, MSU leh ACCJSU hruaitu te chuan hawn an remti dawn lo tih sawiin, Student Hostel an sak mek pawh thawh chhunzawm an remti lo tih an sawi bawk.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram