PMMVY-ah Serchhipin lawmman pakhatna a dawng

Nimin khan Banquet Hall, Ashok Hotel, New Delhi ah Ministry of Women & Child Development chuan Pradhan Mantri Matru Vandana Yojana (PMMVY) Award semna hun a buatsaih a, Serchhip District chuan lawmman pakhatna dawngin, Women & Child Development Minister Zubin Irani hnen aṭangin Serchhip District Bawrhsap Dr. Lalzirmawia Chhangte, IAS, chuan a dawng a, Bawrhsap hi Vanlalpianpuii, Director, Women & Child Development Department leh F.Hmingthankimi, PMMVY Serchhip District Programme Co-ordinator-ten an ṭawiawm bawk a ni.

He Award hi PMMVY Scheme, India rama kalpui ṭan 1.1.2017 aṭanga chhiar ṭana hnathawk ṭha berte hnenah hlan a ni.

PMMVY-in a tum ber chu India rama hmeichhia (Nu) khawtlang leh chhungkuaa an dinhmun hniam lutuk chawi-kânna atan leh Nu-in a fa hmasa ber a pawm laia hna thawklo leh hahdam zawka a lo awm a, naute chu hnute tui a mamawh ang tawk a pek theih nante, nu chu a lo chak zawk theih nante, a inenkawlna turin pawisafai ₹5,000/- pek ṭhin a ni a, hei hi ṭum 3 pekah hmangin, naupai aṭanga ni 150 chhunga a inziahluhin ₹1,000/- an dawng phawt a, thla 6 nau an pai hnua vawi khat ANC neihin ₹2,000/- pek leh an ni a, nau a pian a, hridanna an lak tur ang zawng zawng an lak hnuah ₹2,000/- pek leh ṭhin an ni.

PMMVY kalpui a nih tirh aṭangin tun thlengin Serchhip district-ah nu 1812-in he scheme hi an chhawr ṭangkai tawh a, sum pek chhuah tawh zat hi ₹77,66,000 a ni tawh a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram