DIPRO-in MJA member-te kumthar thingpui a inpui

Nimin khan K.Saitluanga, MIS, District Information & Public Relations Officer, Ser-chhip District chuan a pisa-ah MJA, Serchhip District Member-te lengah sawmin kumthar thingpui inhona an nei.

K.Saitluanga chuan MJA member-te chu kumthar chibai bukin, kumthar thingpui inho an buatsaih tlai deuh chhante a sawifiah hmasa a, kum kalta chhunga Serchhip District MJA member chhungkuaah harsatna lian leh chhiatna hial tawk an awm lo nia a hriat thu sawiin, lawmawm a tih thu a sawi a ni.

DIPRO chuan kum kalta chhungin hripui vanga buaina karah thuthar thehdarhtuten fak tlâkin sawrkar an thawhpui nia a hriat thu sawiin lawmthu a hrilh a. Kum thar lo her chhuakah pawh thawhhona ṭha takte chhunzawmpuiah a sawm bawk.

DIPRO chuan kum kalta chhung khan I&PR Serchhip District chuan Press Release 368 an siam tih sawiin, Covid-19 dona lama mipuite hriattirna lam a tam ber thu a sawi a, an Press Release-te chu district chhunga Newspapers-te leh Electronic Media-ten kim takin an puanchhuahsak vek nia a hriat thu pawh tarlangin, hei hian an thawh hona thatzia a tifiah nia a hriat thu a sawi a, DIPRO Pisa-ah inthlahrung hauh lova an mamawhte lam ṭhin turin a chah bawk.

He hunah hian Kapliana Pachuau, President, MJA Ser-chhip District pawhin thusawi-in, I&PR Department chu nu leh pa anga an en a ni a, a ṭul ang zela thawhpui an inpeih reng tih a sawi a, department ṭha-hnemngaihpuina zarah Serchhip District MJA pawhin Press Club hialte an nei ta chu lawm-awm an tih thu a sawi a, Social Media lamah thu lengvak a tam tak zingah Journalist-te thu leh hla chu tun thlengin mipuiten rintlaka an la ngai zel pawh Journalist-te an la rintawkzia lanna nia a hriat thu a sawi a, thudik zawn kawngah taihmak chhuah zel turin MJA member-te a sawm nghal a ni.

Tun dinhmunah Serchhip District-ah hian MJA Member 14 an awm mek a ni.