Covid-19 vanga thi awm leh

March ni 17, 2021 zan khan Mizoramah Covid-19 hri kai pakhat a thi a, hri kai pahnih hmuhchhuah thar a ni bawk.

Covid-19 avanga thi hi Aizawl Venghlui-a cheng hmeichhia, Ratna Gurung, kum 54 mi a ni a, tun thla ni 11 khan Silchar aṭanga lo haw in, March ni 6-a Silchar a RAgT hmanga sample test tawh negative result nei a ni a. Aizawl a lo thlen hnu-ah Covid-19 hriin a ken natna a taksaah a lan chhuah avangin damdawi in pakhat-ah inentir turin an kal a, sample test leh niin hri a kai tih hmuhchhuah a ni a. ZMC-ah dah luh nghal niin, Nilaini zan dar 11:40 khan a thi a ni.

Nilaini khan ZMC RT-PCR laboratory-ah Covid-19 hri kai hmuhchhuah thar pakhat awmin, RAgT hmangin hri kai tih hmuh chhuah thar pakhat hmuh chhuah a ni bawk a. ZMC RT-PCR Laboratory-a hri kai hi Aizawl Zonuam veng-a cheng, mipa kum 26 mi a ni. Positive contact neih vanga in lamah khung hran lai mek, tunhnaiah a chhungte zing ami hri kai hmuhchhuah a ni a, symptom a nei lo thung.

Ani bakah hian Govt. Complex-a cheng, mipa kum 20 a upa, gym kal ṭhin a ni a, sports competition a tel tum, covid free certificate a ngaih vanga private hospital pakhat a sample test a ni a. Symptom nei lo niin, hri a kaina chhui mek a ni.

Mizorama Covid-19 hri kai tawh zawng zawng chu 4445 niin, enkawl dam tawh 4417 an ni a, enkawl lai mek mi 17 an awm a, mi 11-in an thihpui tawh a ni.