Tunhnaia Electric Bill siam dan chungchangah Lalhmingliani Hmar, Chief Engineer (RE), Office of E-in-C, Power & Electricity Department chuan sawifiahna a siam.
Sawifiahnaah chuan Mizoram sawrkarin hri leng vanga May ni 10, 2021 aṭanga Total Lockdown a puan avangin Consumer Energy meter reading lak, bill sem leh bill counter hawn chu tihtawp lailawk a nih thu a tarlang a, hetianga mipui chetvel inkhuah-khirhna a awm hun chhung atan hian Meter reading lak theih a nih lai thla hnuhnung 3-a energy hman zat aṭanga thla khat average chhût chhuah hmangin provisional bill siam a nih tur thu te, bill hi sem chhuah a nih dawn loh thu leh online hmanga bill pe duh leh pe thei tan bill hi pek theih a nih tur thu te, online hmanga bill pe theilo tan pawh Bill counter hawn theih a nih veleh hrileng avanga mipui chetvel khuahkhirhna a awm chhunga bill pek loh tling khawm chu bill pek tlai avanga a pung (late payment surcharge) tel lovin a hlawma pek mai tur a nih tur thu te, Energy meter reading a pangngaia lak theih a nih veleh Provisional bill lo siam tawhah siam rem ngai a awm a nih chuan siam rem a nih tur thute official Circular hmangin tihchhuah a nih thu a tarlang.
April 2021 thlaa êng chhit man hi JERC (M&M) in êng chhit man thar a bithliah hman ṭan hun chiah a ni a. P&E Department-in bill a siam ṭhin danah April thlaa power kan hman man hi June thlaah bill ṭhin a ni a, chuvangin Provisional bill pawh hi êng chhit man thar hmang veka siam a ni tih sawiin, Total Lockdown puan a nih tak avanga May, 2021 thla laihawl vel aṭang khan Bill counter khar lailawk a ni a, khatih hun lai atanga Bill pe tawh lo tan chuan tun ṭum (July,2021 thla)-a provisional bill lo chhuak hi thla 3 bill tling khawm (Principal amount leh lockdown hma lama arrear lo nei sa tan chuan chung arrear tel vek chuan) a ni tawh dawn a, tun ṭuma bill lo chhuak hi thlakhat bill anga lo ngai tan chuan a lang tam viau thei bawk a ni, a ti.
Provisional bill siamah hian tihsual palh awm thei a ni a, bill chungchanga Complaint thehlut duh leh bill pe duh tan Sub Division Office bikah Bill Counter hi ni 5.7.2021 aṭang khan hawn ṭan a ni leh tawh a, mamawhtu te tan mahni bialtu SDO office pan theih a nih thu a tarlang bawk.