Tottenham forward Son Heung-min chuan Spurs tan kum 2025 thleng la khel turin kum 4 daih contract thar a ziak.
Kum 29 mi, Son hian kum 2015-a Bayer Leverkusen aṭanga Tottenham a zawm hnuah Spurs tan hian match 280 khel tawhin, goal 107 a thun tawh a, an ram, South Korea tan match 93 khelin goal 27 a thun tawh a, World Cup ṭum hnih a khel tawh a ni.
Son chuan contract a ziak thar chungchang sawiin, “Thutlukna pawh a ni lo. Thil awlsam tak a ni. He hmunah hian ka hlim takzet a, fan-te nen hlim takin kan inhmu leh thuai dawn a ni,” a ti a, “He hmuna kum 6 chhung khelh hi chawimawina ropui tak a ni,” a ti bawk.
Son hi Tottenham tana player ṭangkai tak a ni a, kum 2019-a Tottenham-in a vawi khatna atana Champions League final an thlenna atan pawh a thawh hlawk hle a, Manchester City nen quarterfinal-a an inhmachhawnnaah Second leg-ah goal 2 thunin away goal rule hmangin hnehna an chan phah a nih kha.
Season liam ta khan Spurs tan competition zawng zawngah match 51 khelin goal 22 a thun a, an striker Harry Kane nen an inkawp fuh hle a, season liam ta Premier League-ah an pahnih hian goal 14 an thawkchhuak dun a, Professional Footballers’ Association Team of the Year-ah pawh an hming a lang ve ve a ni.