PSG tan Messi-a’n kum 2 contract ziak a remti

Lionel Messi chuan rin loh taka Barcelona a chhuahsan hnuah ama sawi ang ngeiin Paris St-Germain-ah a lut dawn ta niin a lang a, Paris St-Germain tan kum 2 daih tur contract ziak a remti tawh niin BBC Sports chuan a tarlang.

Tarlan tawh angin, kum 34 mi, Messi hian Barcelona-ah hlawh hniam zawk hlawh tura khelh remti zet mahse La Liga financial fair play rules hnuaia dan thar avangin Barcelona tan a khel chhunzawm thei ta lova, mittui nen Barcelona a mangṭha hnuah French khawpui a pan dawn ta niin a lang a, PSG-a lut tur hian medical paltlang chiah a hmabak tawh niin vawiin (10.8.2021) hian BBC Sports chuan a tarlang a ni.

BBC Sport columnist Guillem Balague chuan, "Engkim tihchian a ni tawh. Messi hi PSG player a ni dawn a ni," tiin a sawi a, Messi chuan a team-mate hlui Brazilian Neymar nen PSG-ah an inkawp leh dawn ta a ni. PSG hian kumin nipuiah player pathum chu free transfer-in an lo lalut tawh a, Messi hmaah hian midfielder Georginio Wijnaldum, defender Sergio Ramos leh goalkeeper Gianluigi Donnarumma-te chu free-in an lalut tawh a, Inter Milan aṭangin Achraf Hakimi chu an lalut tawh bawk a ni. PSG-a Messi luhna tura tihfel ngaite an tifel zui nghal mai thei a nih chuan Inrinni-a Ligue-1-a an match hmasa bera Strasbourg an hmachhawn hunah a khel hman ang. Messi hi Barcelona tan bak a la khel lova, kum 13 mi a nihin Barcelona hi a zawm a, Barca tan game 778 khelin goal 672 a thun hman a, Catalan club tan hian trophy 35 zet chawi hmangin, khawvela player ṭha ber chawimawina Ballon d'Or pawh ṭum 6 lai a dawng hman a ni.

Leave a Reply

This site uses Akismet to reduce spam. Learn how your comment data is processed.