Mizoram sawrkarin September 2021 thleng khan state pawn aṭanga kawlphetha leina man la pek loh cheng Vbc. 47.21 a nei a, hetihlai hian tun dinhmunah Small hydel project (SHP) leh Solar plant hmun 10 siam turin hmalakna a kal mek.
Power & Electricity department-in RTI zawhna a chhan danin, kum 2020-21 chhung khan state pawn a kawlphetha hralhna man aṭangin cheng Vbc. 34.5095 Mizoram sawrkarin a hmu a, hetihlai hian September 2021 thlenga state pawn aṭanga kawlphetha leina man la pêk loh/ba awm zat chu cheng Vbc.47.21 a tling a ni.
RTI chhânnaa tarlan a nih danin, kawlphethaa Mizoram a intodelh theihna turin, Mizoram sawrkarin hmalakna hrang hrang a nei a, chungte chu – MW 20 siam theihna tur Vankal solar plant (siam mek) te, Saitual solar plant – MW 10 (siam mek) te, Tlawva SHP – MW 5 (commissioning tih mek) te, kW 100 siam thei tur Tuiching (siam zawh tawh, la commission loh) te, Tuiriza – kW 100 (siam zawh tawh, la commission loh) te, Kawlbem – MW 4 (siam mek) te, Tuivawl – MW 42 (DPR siam tawh), Iva – MW 3 (DPR siam tawh), Ngengrual – MW 1 (DPR siam tawh) leh Khawiva – II – MW 0.7 (DPR siam tawh) te an ni.
Tun dinhmuna Mizoramin Hydel project 11 a neihte chu Small hydel project a ni tlangpui a, chung zingah chuan tun dinhmunah kawlphetha siam theih zat (installed capacity) siam chhuak thei an awm lo a. Mizoramin SHP a neih len ber, Serlui B, MW 12 pe chhuak thei tur pawhin tun laia kawlphetha a siam theih zat chu MW 3.96 chauh a tling a ni.
-Zalen