Skip to content
Home » Chanchinthar » March ni 23-ah sawrkarin Journalist pension scheme a peih hman ngei kan beisei:MJA President

March ni 23-ah sawrkarin Journalist pension scheme a peih hman ngei kan beisei:MJA President

MJA Gen. Hqrs. President Zonunsanga Khiangte chuan Mizoram Journalist Pension Scheme chu MJA Golden Jubilee lawmna hun khârna, March ni 23, 2021-a Aizawla neih hunah sawrkarin MJA Golden Jubilee present atan a hman an beisei tih a sawi.

He thu hi Thawhlehnia MJA, Serchhip District Annual Conference 2022, Serchhip Press Club-a neih a hmanpuinaah a sawi a, Zonunsanga Khiangte chuan MJA Golden Jubilee lawmna khârna hunah hian MJA Member Pension scheme dawng thei turte hnenah sawrkarin a hmasa ber atan a pek chhuah hman ngei an beisei tih sawiin, MJA beiseina hi a hlawhtlin loh chuan “Kan lungawi lo hle ang,” tiin a sawi bawk.

MJA President chuan Mizoram Journalist-te chu sawrkar hmalakna tichaktu pawimawh tak, sawrkar hmalaknate mipui hnena puang darhtu ber an nih thu sawiin, sawrkar khalh ngil a ṭul huna sawrkar khalh ngiltu pawimawh tak an ni a ti a, India rama state dang zingah Mizoram Journalist-te anga sawrkar thawhpuitu ṭha an awm lo tih a sawi bawk.

MJA, Serchhip District Annual Conference hi hun thumah ṭhen niin, hun khatna, C.Ramengmawia, Vice President kaihhruaiah hian Kapliana Pachuau, President chuan inlawmna thu sawiin, H.Lalbiakzauvi, Secretary i/c Finance-in hunserh a hmang a, T.Biakchamliana, Gen. Secretary hnen aṭangin kum 2020-22 chhunga MJA, Serchhip District chetvelna tlangpui ngaihthlak a ni a, K.Saitluanga, DIPRO, Serchhip hnen aṭangin thusawi ngaihthlak niin, RL Hlupuia, Secretary i/c Information-in lawmthu sawiin hun a khâr a ni.

Hun hnihnaah Kapliana Pachuau, president kaihhruaiin an pawl chhung inrelbawlna chungchang rorel neih niin, resolution pahnih – ‘Serchhip District Hospital thar sak a nih thuai theih nan hmalak ni rawh se” tih leh, “Kum 2022 chhungin sawrkar hmalakna Project Site Visit tam zawk neih ni rawh se” tihte pass a ni.

Hun thumnaah MJA Gen. Hqrs. hruaitute kaih-hruainain kum 2022-24 chhunga MJA, Serchhip District hruaitu tur thlan niin, president-ah C.Lalhming-hlua, Vice President-ah C.Ramengmawia leh Treasurer-ah Lalremruata Ralte-te thlan an ni a, heng bakah Executive Member tur mi panga thlan chhuah an ni bawk.

Tun dinhmunah Serchhip District-ah MJA mem-ber 15 an awm a, an zinga 3 hi Thenzawlah awmin, N.Vanlaiphaiah pakhat a awm a, a bak zawng chu Serchhipa awm an ni.

Leave a Reply

This site uses Akismet to reduce spam. Learn how your comment data is processed.