Sawrkar Laipuia Ministry of Science & Technology-in Mizoram tana a thlawna an pek Mobile I-Lab (Infectious Disease Diagnostic Laboratory) chu a nihna ang taka hmang ṭan turin khawl mamawh a la kim lo deuh a, hengte hi lei turin hma an la mek tih Health Minister Dr R. Lalthang-liana’n a sawi a, hun reilo-teah a nihna tur ang takin hman theih a rinawm a ti.
Health Minister leh Health & Family Welfare Board Vice-Chairman Dr ZR Thiamsanga-ten Mobile I-Lab awm lailawkna hmun Lengpui CHC hi Inrinni khan an tlawh a, Mizoram sawrkar leh Institute of Bioresources and Sustainable Development-ten inremna an ziah angin mobile I-lab-a hman tur mamawh chi hrang hrangte leh thawktu – Senior laboratory technician, Data Entry Operator leh Driver pakhat ṭheuh hlawh hi kum khat chhung a tum ang a, hemi hnu hian Mizoram sawrkarin senso zawng zawng hi a tum chhunzawm tawh dawn a ni.
Mobile I-lab hi cheng nuai 105 man a ni a, sample test hna thawk tur laboratory technician-te hi karleh khian ZMC-ah training pek an ni dawn a, lirthei registration buaipui mek a ni a, National Accreditation Board for Testing and Calibration Laboratories (NABL) hnenah hman phalna license dil mek a ni bawk.
Health Department hotute sawi danin, mobile I-lab chu a len bakah a sâng deuh a, thingtlang hmun kilkhawr ber berahte kal theih lohna a nei a nih chuan a kal theih chin tawp berah inhûngin mipuite pan theih turin an inchhawp hnai ṭhin dawn a, mobile I-Lab siamtu Andhra Pradesh MedTech Zone Ltd., Vishakapatnam chuan ni khatah sample 50 vel test theih a nih tur thu an lo sawi tawh bawk a ni.
Health Minister chuan Mizoram chu hmarchhak State zinga Mobile I-Lab dawng hmasa ber leh a dawng awmchhun an ni, a ti a. Manipur-ah mobile- I-lab hi a awm ve thu sawiin, chu erawhchu sawrkar tâ ni lovin, private company tâ, man neia an hman hawh a ni, a ti.
Dr Gracy Laldinmawii, Asst. Professor, Department of Microbiology, ZMC chuan mobile I-lab chu labo-ratory building nen khaikhin chi a nih loh avangin a danglam deuh a, a thawktu turte pawh uluk lehzuala training pek an ngai dawn a ni, a ti a, mobile I-lab chu rawn thleng mahse a rawn ken tel loh, hnathawhna atana ṭul si khawl chi 4 vel a la awm a, hengte hi kan ngaihtuah mek a ni, a ti bawk.