Lengpui Airport thuam-ṭhatna hna hrang hranga KR Construction, Ṭhuampui leh Zoramchhana, Electric veng, Aizawl te hnena hna pek final estimate belh-khawm chu ₹41,77,48,855 a tling.
Assembly budget session neih meka Serchhip bialtu MLA Lalduhoma zawhna, PWD changtu Chief Minister Zoram-thanga’n ziaka a chhân danin, kum 2018-19 aṭanga tun inkarah KR Construction, Ṭhuampui, Aizawl hnenah, restricted tender hmanga PWD hnuaia hna chi hrang hrang pek tawh zat belhkhawm final estimate chu ₹40,92,95,776.04 a ni tawh a. Hemi hun chhung veka Zoramchhana, Electric veng, Aizawl hminga hna pek final estimate belhkhawm pawh ₹74,76,02,268.07a tling.
Restricted tender tender hmanga KR Construction hnen a hna pek tawh zawng zawngte chu 7 niin, nikum 2021 chhunga pek vek a ni a, chung zinga 4 chu Lengpui Airport thuam ṭhat kaihhnawih a ni.
KR. Construction hnenah vek hian kum 2019-20 khan PWD Saiha Division hnuaiah tender hmangin hna pahnih – work order amount ₹35,05,54,147, Chakhei to Siasi (20.00) Km F/C & Pavement works leh work order amount ₹12,16,87,-740 Chakhei to Siasi (20.00) Km permanent works te pek ni bawkin, tender leh restricted tender hmanga KR. Construction hna pek zawng zawng final estimate belhkhawm chu ₹88,15,37,663.04 a ni.
PWD changtu Chief Minister-in ziaka zawhna a chhânnaa tarlan a nih danin, kum 2018-19 inkar chhung vek a Zoramchhana, Electric veng, Aizawl hminga hna pek tawh zat chu 5 niin, chung hna te chu kum 2021 chhung a pek a ni a, hna a hmuh zawng zawng final estimate chu ₹74,76,02,268.07 a tling. Zoramchhana hnena hna pek dan zawhna leh chhanna ah tender emaw restricted tender emaw tarlan a ni lo.
Lengpui Airport thuam ṭhatna atana KR Construction-in hna a hmuh 4 final estimate belhkhawm chu ₹27,27,73,928 a ni a, Zoramchhana, Electric veng, Aizawl in Airport thuamṭhatna atan vek a hna a hmuh final estimate chu ₹14,49,74,927 a ni bawk.