Home Minister Lalchamliana chuan Aitlang, Buarchep leh Saihapui ‘V’ atanga Assam Police-te hnawhchhuah tumna a awm a, Ramri a duty Police-te thuamchak tumna a awm bawk a ni a ti a. Assam leh Mizoram hian ram hauh chin an nei ve ve a, ramri buai hi chinfel a la nih loh avangin Assam Police te’n Mizoram an awm chin zau zawng chu sawi mai theih a ni lo a ni, a ti.
He thu hi nimina Assembly Budget Session-a Congress member Lalrindika Ralte zawhna chhangin a sawi a, Home Minister chuan Assam leh Mizoram-in ramri an pawmdan a inang lova, Mizoram sawrkarin state pahnih ramri-a a pawm chu “Notification No. 2299P dated 20th August 1875 ‘Inner Line’ on the Southern Frontier of the District of Cachar” in a ramri a tarlan chin a nih thu leh, hei hi hmun tam takah Assam awpna hnuaiah a awm tih a sawi a, ram hi chân a la nih loh thu leh, laklet tuma hmalak mek a nih thu a sawi.
Opposition group leader Lalduhoma zawh belhna chhangin minister chuan ramri chungchangah sawrkar chu 1875 notification-ah a ding tlat tih a sawi a, “Sawrkar chauh a ni lova, Mizoram leh Cachar ramri, 1875 Inner Line Regulation behchhana notification siam kha ramri dik tak a ni titu mipui leh party hrang hrang kan ni a, a hlawhtlin leh tlin loh tur tuman kan sawi theiin ka ring lo,” a ti.
Assam nena ramri buai chingfel tur hian District bawrhsapte an lo inbe fo tawh a. State pahnih Chief Secretary te pawh an inbe tawh a, Chief Minister pahnihte pawh Delhi-ah an inbe tawh a ni, a ti a. State pahnih inkara buaina a nih avangin state pahnih remtih dunna chu inremna tur a ni, a ti. “Amaherawhchu ramri-a harsatna chinfelna tur hian vawiin thlengin engmah result ṭha a la awm thei lo,” tiin a sawi.
Home Minister sawi danin ramri chinfelna dan turah nikum July 14 khan political party zawng zawng aiawh leh NGO aiawhte inrawnkhawm a ni a, chu chuan pawl leh party zawng zawng telna boundary committee din ṭha an tih angin din a ni. He committee hi Dy CM ho-in vawi 3 an ṭhukhawm tawh a, JAC on Inner Line Reserve-ten central-ah boundary commission din tura rawtna an lo thlen tawh chu sawihoin boundary commission din tawh ṭhinah harsatna an chinfel theih ngai loh thute sawilan a ni a, a chingfeltu tur tak tak chu Constitution-in a sawi angin Parliament chauh a nih thu tarlan a ni a. “Chuvangin boundary commission chu kalpui tawh lo mai ang u” tiin rawtna a awm a, hei hi he committee-a tel ve JAC on Inner Line Reserve tih chauh lo chuan a ṭha an ti,” tiin ramri buai chungchanga Mizoram rawn tlawh tura sawi ‘Manohar Parrikar Institute for Defense Studies and Analyses (MPIDSA) Team’ te lo pek tur document pawh peihfel tawh a ni tih a sawi a. “MP-IDSA team te hi nikum kum tawp November aṭanga lo kal tum kha, tun thlengin an lo la kal ta lo,” a ti.
Hetihlai hian Assam cabinet minister, border changtu Atul Bora chu nikum August ni 5 khan Mizoram-ah lo zinin rawtna a siam a, hemi hnu hian video conferencing vawi 2 neih a ni tawh tih a sawi a, Atul Bora chuan, “Meghalaya nena kan tih danin border chingfeltu tur ‘regional committee’ din ve ṭha in ti em?” a ti a. “Ti e, mahse in tihdan phung, ‘term of reference’ te min hrilh ula, keiin thutawp ka siam thei lova, chief minister ka lo sawipui ang,” tiin kan inthlah,” a ti a. Hemi hnu hian vawi 2/3 remind leh tawh a ni chungin an tihdan an la rawn thawn theih loh thu a sawi.
“Bounday Committee-in kan duhna chu engtik ni-ah emaw hmaichhanah kan sawiho ang a, 1875-ah kan ding phawt ang. Chutah chuan kan inbiak dan leh boruak ṭhat dan a zirin hma kan la chhunzawm zel ang tih hi tuna kan dinhmun leh hmalakna mek a ni,” tiin Mizoram-Assam ramri chungchang a sawi.