Nimin kha ‘World Hearing Day 2022’ a ni a, he ni pual hian Serchhip District Hospital OPD-ah hun hman a ni.
World Hearing Day hi National Programme for Prevention and Control of Deafness bultumin kumtin March ni 3-ah hman ṭhin ni mahse Serchhip District-ah erawh remchan zawkna avangin nimin khan hman a ni a, kumina he ni thupui atan h niian ‘To hear for life, listen with care’ tih hman a ni.
He hunah hian Dr. ZD Lalmuanawma, District Medical Superintendent chuan Serchhip District hospital-a beng ri hriatna ṭhat leh ṭhat loh enna awm chu hmang ṭangkai turin mipuite a sawm a, kum upat hnu thlenga beng ṭha tak kan neih theih nan tun aṭanga kan enkawl uluk a ngai a ni tiin, he ni puala March ni 1- ni 3 thleng NPPCD-ten a thlawna inentirna an buatsaih chu hmang ṭangkai turin mipuite a sawm a ni.
PC. Lalbiakzuali, Audiometrict Assistant chuan report pe-in, NPPCD chu Serchhip District-ah kum 2016 kumtawp aṭang khan kalpui ṭan niin, tunah hian District Hospital OPD chungah an awm mek a, Hospital inentir ni-ahte beng ri hriatnaa harsatna neite tan inentir theih reng a nih thu a sawi.
Report aṭanga a lan danin nikum April aṭanga kumin January thleng khan Serchhip District Hospital OPD-ah mi 1787-te chu ENT kaihhnawihah inentirin, an zingah hian mi 748 beng endiksak zinga mi 200-te an beng a ṭhalo tih hmuhchhuah niin, damlo en zât aṭangin beng ṭhalo hmuhchhuahah Serchhip District chu a sang ber dawttu a ni.