Chief Minister Zoramthanga hovin nimin khan CM Conference Hall-ah Zokhawsanga Assam Rifles insawn chungchanga ngaihtuah tur pawimawhte ngaihtuahin an ṭhukhawm.
He ṭhutkhawmnaah hian Deputy Chief Minister Tawnluia, Home Minister Lalchamliana, Land & Revenue Settlement Minister Lalruatkima-te bakah Assam Rifles hotute, Mizoram sawrkara Home, Revenue leh Department ṭhenkhat hotute an tel a ni.
He ṭhutkhawmnaah hian kum 2019 a Ministry of Home Affairs in Assam Rifles insawn thuai tura lehkha a lo thawn tawh hnua ṭhenkhat chauh an la insawn leh, Assam Rifles lamin hun tiam an bawhpelh nasat lutuk chungchang sawiho a ni a, Mizoram sawrkar chuan a tih tur angte a tih tawh thu leh, infrastructure chungchanga bawhzui ngai ṭhenkhat an thlente pawh chak taka bawhzui thuai a nih zel tur thu sawiin, Assam Rifles lam aṭanga an la insawn theih lohna chhan chu anmahniah lo sawiho a, rang taka hma la turin an inhrilh a ni.
Deputy CM leh Home Ministry lam tun hnaia an inkawmnate ngaihthlak niin, hemi chungchangah hian sawrkar laipui aṭangin Mizoram lo kal tur an awm thu sawi a ni bawk.