Mizoram Larsap Hari Babu Kambhampati chuan nimin khan Mizoram Gorkha Youth Association (MGYA)-te huaihawt, Gorkha-te tana ziak leh chhiar bakah hnam hmasawnna kawnga thawh hlawk tak, Adi Kavi Bhanu Bhakta Acharya piancham vawi 208-na lawmna Aizawl Vanapa Hall-a neih a hmanpui.
Larsap chuan, Bhanu hnathawhte leh a sulhnute chu Gorkha-te tan a hlu tih sawi a, Bhanu-in Sanskrit aṭanga Nepali ṭawnga Ramayana a lehlin hnu aṭang hian Nepali ṭawngin nasa takin hma a sawn phah a, tunah phei chuan Nepali ṭawng chu India Danpui chhunga 8th scheduled-ah sawrkar hriatpui ṭawng hrang hrang zinga pakhat a lo ni ta a, hei hi a ropuiin he hriatpuina pawimawh tak hian hlawkna tam tak a keng tel a ni a ti.
Mizoramah chuan Gorkha chu hnam tlem zawk niin tunah hian mihring 20,000 bawr vel chiah ni mahse Mizoram hmasawnna atan chuan tih theih leh theihna sang tak nei nia a hriat thu a sawi a, hnam tlem zawkte an nih avanga engemaw harsatna an neih theih angte pawh zirchian a, siam rem ngai lai te pawh sawrkar thuneitute lo sawipui a tum thu a sawi a ni.