Health Department chuan thuchhuah siamin, tunhnaia Thenzawl khuaah Japanese Encephalitis (JE) natna hmuhchhuah nia chanchinbu lama tarlan chu ELISA (antibody test) hmanga hmuhchhuah a ni a, hei hi confirmatory test a nih loh avangin a CSF sample hi test-na rintlak zawk (Real Time PCR) a test turin, Lal Path Laboratory, Kolkata-ah thawn a ni a, ni 20.7.2022-ah he sample test result hi tihchhuah a ni a, he test result-ah hian sample hi a Negative a, JE virus hmuh a nih loh avangin, Japanese Encephalitis confirmed case anga pawm theih a ni lo tih an sawi.
Hetiang a nih avang hian Director of Health Services kaihhruaina hnuaiah meeting neih nghal a ni a, Health Department Official-te meeting chuan investigation mumal zawk kalpui ṭha a ti a, Epidemiological, Entomological leh Environmental investigation-te nei tura hmalak mek a ni tih tarlangin, Mizoram chhunga Real Time PCR test (molecular diagnosis) ti thei tur pawhin hmalak nghal a ni tih a tarlang a, tun dinhmunah mipuite tan chiaina tur a awmlo a, Health Department chuan chak takin hma a la zel dawn a ni, an ti bawk.