Champhai Urban Primary Health Centre (UPHC), Champhai Vengthar ami chu nimin khan Health & Family Welfare Minister Dr. R. Lalthangliana’n a hawng.
Hawnna inkhawmah hian Law & Judicial Minister TJ Lalnuntluanga, Champhai South bialtu MLA leh H&FW Board Vice Chairman Dr. ZR. Thiamsanga, Champhai North bialtu MLA-te pawh an tel a ni.
Champhai Urban PHC din tur hian kum 2020-2021 ah khan Sawrkar laipuiah din phalna dil a ni a, April 2021 aṭang khan Education Department Building, Champhai Vengthar luah hawha bulṭan niin, tun dinhmunah hian thawktu 11 – Doctor – 1, Staff Nurse – 3, Health Worker – 2, Group D – 2, Pharmacist – 1, Lab. Tech-1, Accounts Clerk – 1 an awm mek a, khum 6 a awm a, OPD, Laboratory, Immunization, NCD leh program hrang hrangte kalpui a ni.
UPHC hian chhungkua 6881, mihring 34,333 bakah Urban ASHA 7, Sub-Centre 6, Mahila Arogya Samity 6 leh Anganwadi Centre 44 te a huam mek a ni.
Health Minister hian nimin vek khan Champhai District Hospital-ah RT-PCR Laboratory, Paediatric Intensive Care Unit (PICU) leh Trauma Centre a hawng nghal bawk a ni.