Tunlai hian Serchhip khawpui chhung veng hrang hrangah vawk dam lo leh vawk thi report a awma, AH & Vety Department-in Rapid Test Kit hmanga an enfiahna aṭang chuan vawk hri leng ṭhin Classical swine fever (CSF), Porcine Reproductive and Respiratory Syndrome (PRRS) leh African Swine Fever (ASF) hnuhma hmuh a la ni lo.
Zothlifim-in hemi chung-changa Serchhip District Veterinary Officer (DVO) Dr. R.Lalmakthanga a biaknaah, DVO chuan Vawk dam lote hi chaw ei duh lo, luak leh khawsik angin a lang chhuak tlangpui a, an khawsik erawh a sâng lutuk ngai lo a, enkawlna pek chuan an dam leh deuh mai zel tih a sawi a, tuna vawk damlo hi a hmaa vawk hri lêng anga inkaichhawng sup sup ang kha a ni lo a, enkawl dam an har loh avangin chi-aina tur a awma an hriat rih loh thu a sawi.
AH & Vety Department hian Serchhip khawpui chhungah vawk thi 6 vel report an dawng tawh a, hemi rual hian vawk rai lai damloten an no an chhiat tih DVO chuan a sawi bawk a, vawk thi aṭanga sample an lakte hi Laboratory-a test turin an thawn tih a sawi bawk.
DVO chuan Serchhip khaw pawn lam aṭangin vawk thi report dawn an la nei lo tih a sawi a, vawk damlote hi enkawl hma chuan an dam leh mai zel avangin vawk damlote chu a rang lama enkawlna pek an ṭha tih a sawi a, vawk thi neite chuan a Vety department hriattir ṭhin turin mipuite a chah bawk.
Nimin khan DVO ho hian Serchhipa AH & Vety Department-a thawktute chu he thil thleng chung-chang thlirho leh hmalak dan tur ngaihtuahin an ṭhukhawm a, vawk damlo thisen sample hmun hrang hranga mi lak a, Laboratory-a endik tura thawn zel nise an ti a, nimin aṭang khan sample hi an lakhawm ṭan a, vawiinah pawh an lak chhunzawm leh dawn a ni.