Kolasib Fast Track Court chuan Heroin hawng 26 mansak vanga thubuai nei Zarzova (45), Mauchar chu hrehawm taka kum 10 chhung jail tang tur leh pawisa Rs.1,00,000/- chawi turin a hrem.
March 20, 2021 khan Excise & Narcotics Department hnuaia Anti Narcotics Squad chuan report an dawn bawhzuiin Zarzova leh Lalduhawma (25)-te chu Bukpui area, Ralbawm ramah an man a, Zarzova hian Heroin 324 gms chu midangte nen inpek ruk an tum lai tak nangchingin an man a ni. A rual hian bike khalhtu Lalduhawma pawh an man tel a, an lakah hian ND&PS Act tlawh chhanin thubuai ziahluh niin Fast Track Court-ah ngaihtuah zui a ni.
Fast Track Court Judge R.Vanlalena’n nimina hrem-na a tihchhuahah Lalduhawma bike chu Zarzova hian Taxi anga hire-sakin bag-ah heroin keng chungin Ralbawm ramah hian a leitu turte nen inpek ruk an tum lai chu Anti-Narcotics Squad te chuan an man niin tarlan a ni a, Lalduhawma hian Zarzova thil sual tih tum chu a hriatpui loh avangin Court chuan thiam a chantir a, Zarzova erawh chu hremna pe-in a pawisa chawi tur hi a pe lo a nih chuan kum khat dang a tan belh leh bawk ang.