Governor aiawha Chakma Autonomous District Council sawrkar enkawltu ni mek, CADC Caretaker, Lawngtlai District Bawrhsap chuan CADC hnuaia hmasawnna hna hrang hrangte mipuiin an hriat theih nan CADC website tihchantlunna tur thuchhuah a siam a, CADC hnuaia department hrang hrangte chuan thawktu awm dan leh an hlawh te, department hnuaia scheme hrang hrang leh hna thawh mek chungchang – contractor, project cost, thawhna hmun, hmasawn dan leh hriattirna leh thu chhuah pawimawh zawng zawng chu Website-a dah turin a hriattir a ni.
Tunlai khawvelah miin Internet an hmang nasa tawh a, sawrkar mai bakah company te, pawl hrang hrang te, mimal thlengin ṭangkai takin internet an hmang tawh a, chuvangin an thil tih duh tam tak te chu mahni inlum aṭangin, hun leh tha, sum leh pai tlem zawk sengin an ti thei tawh a ni.
Hetianga mipui zangkhaina tur atan hian sawrkar pawhin hma a la a, Mizoram sawrkar hnuaia Department hrang hrangte pawh Website siamtir an ni a, chutihlaiin sawrkar department tam zawk hian an website te an enkawl ṭha lo hle hlawm a, hei hian mipuite tana awlsamna a thlen theih tam tak te chu a hlawhtlinna hmuh turin a awm loh phah a, a pawi hle a ni.
Tunhnai chho-ah DC Office-a kal kher ngai lovin, Tribal Certificate, Residential Certificate etc. te Internet kaltlanga dil theihin siam a ni a, hei hi mipuiten an ṭangkaipui hle a, a bikin District Hqrs. ṭhuthmuna awm lo te tan a ṭangkai a, an hun leh tha mai bakah, sum leh pai an senna tum tam tak an sen loh phah a, hei hi thil ṭha tak a ni.
Chuvangin Sawrkar Department hrang hrang te pawh hian mipuite tana thawktu an nih angin internet kaltlanga mipuite tana awlsamna an thlen theih dan kawng hi zawng ṭheuh se a duhawm hle a, District level-ah pawh Website nei hlawm se, chutah chuan Application form download mai tur te, mipuiten Office-a kala an zawh kher ngai lo turin information pawimawh hrang hrang te dah thei se a duhawm khawp mai.