Minister-ten bawhzuipui ve ṭhin se

Niminpiah khan Social Welfare Minister chuan Serchhip Kawlri Tlanga cheng Vaibelchhe 12 senga sak mek, Eklavya Model Residential School (EMRS) sak mek chu tlawhin, hnathawh kal lai mek te a enfiah a, nimin khan LAD DistrictPark siam mek a tlawh bawk a, hnathawktu ten an harsatna an thlen chungchangah Minister chuan a mawhphurtute chu hma la turin a hrilh a ni.

Nikum (?) ṭhal chhung khan Chhiahtlang – Lamchhip Road chu siam tura sawi a ni a, amaherawhchu hmanni lawka District Level Vigilance and Monitoring Committee ṭhutkhawmnaah tun thlenga siam a la nih loh chhan zawhna chu kawng siamna tur pawisa sanction a rawn kal leh tak si loh vang a nih thuin chhân a ni.

Hetianga thil engemaw siam/saknaa harsatna awm leh kan mamawh thil te siam tura Minister-ten an hnuaia hnathawktute bawhzui tura an hrilh ṭhin hi a lawmawm rualin, an hnuaia mi te hian tih theih chin an nei tih hriatpui se, bawhzui tura an hrilh te an bawhzui dan hriatpui zuiin, an tih theih chin bakah anmahni Minister thil tihtheihna hmangin bawhzui pui ve ṭhin se thil duhawm tak a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram