Nimin khan Lirthei khalh fimkhur hapta kan tih mai ṭhin, Road Safety Week hman ṭan a ni a, kumin thupui-ah chuan “Accident laka kan fihlim theih nan a takin hma i la ang u” tih hman a ni.
Nimina Serchhip-a he hun hmannaah hian District bawrhsap chuan Mizorama Motor accident chungchang zir chiang tura hotuten an ruat avanga amah ngei pawhin theihtawp chhuaha a lo beih ve tawh thu sawiin, motor accident chhan tam ber pakhat chu fimkhur loh vang leh hmangchang hriat loh vang a ni a ti a, hei hi a dik ngei pawh a rinawm a, lirtheia chetsualna tam zawk hi lirthei khalhtute leh mipui lam kan fimkhur tawk loh vang niin ngeiin a lang.
Lirthei khalh ṭhin zingah fimkhurna tlachham tak tak kan tam a, lirthei khalh lai ngaihtuah tawk lo leh lirthei khalh chunga thil dang tihpah ching te hi an chesual fo ṭhin a, tin, ruihtheihthil avanga lirtheia chetsualna pawh hi a thleng fo bawk a, ruih tawh hnu-a lirthei khalh loh te pawh hi a finthlak hle a ni.
Hei bakah hian lirthei khalhtute hian kan kawng a chep tih hria-in, kawngpui sira kan lirthei te kan hûn dawnin, lirthei dang tlanna tur kawngpui zau thei ang ber zuah tumin, kawng sir nek thei ang bera kan lirthei hun te pawh hi i ching ang u.
Mipui lam pawhin lirthei kan ngam mah mah ṭhin a, kawngsira kalna tur Footpath kan nei reng chungin motor kawngpuia kal tlat ching te kan awm a, tin, lirthei lo tlan kawng kian ṭha duh mang lo te hi kan awm ve tho bawk. Lirthei kan ngam lutuk vanga tawh-sual kan tawk a nih chuan a na ber tur chu keimahni kan ni tih te pawh hi kan hriat thar hi a ṭul âwm e.
Tin, naupang tam tak, motor kawngpuia infiam ching leh thirsakawr khalh ching an awm a, nu leh pa te hian kan fa ten tawhsual an tawh loh nan motor kawngpuia infiam lo tur te, lirthei hlauh nachang hre turten kan fa te i zilh ngun bawk ang u.
Accident laka kan fihlim theih nan lirthei khalhtuten fimkhur taka lirthei khalh leh mipui lam pawh lirthei vanga chetsualna thleng thei laka lo fimkhur ve hi a taka hma kan lo lak ve dan tur ṭha ber chu niin a lang.