Thing phun pawimawhzia mipuite rilru-ah tuh a tul

Nimin khan Mizoram pumah Green Mizoram Day hman a ni a, he ni pual hian hmun hrang hrangah thing ṭiak phun niin, Serchhip-ah pawh nikum hmasa lama thing phun te bawhzuiin, thing ṭiak phun belh ngaihna hmunah te phun belh a ni bawk a ni.

Green Mizoram Day-ah hian sawrkar hnathawk leh zirlai naupang te bakah tlawmngai pawl ten a huho-in thing ṭiak kan phun ṭhin a, hei hi a chhan bulpui ber chu sawrkarin thing phun a ṭulzia hria a, a hranpaa thing phunna tura hun a duan ṭhin vang a ni.

Sawrkar ruahmannaa he ni-a thing ṭiak kan phun ṭhin hi thil ṭha tak a ni a, chutihrual erawhin mipuite rilru-ah thing phun pawimawhna leh kan tana thing phun uar a ṭul tawhzia hi kan hriatchian tir tawk em tih hi ngaihtuah a ṭul a, Green Mizoram Day-a thing phuntute rilru ngei pawh hi thing phun ṭulna leh kan thing neih sa te venhim a ṭul tawh zia hmang hian kan hmin ṭha tawk em tih hi ngaihtuah tham tak a ni.

Sawrkarin Programme a duan avanga kan mawhphurhnaa ngaia thing kan phun hi a ṭha a, mahse thing phuntu leh mipui rilruah thing phun pawimawhna leh kan mamawh tawhzia-in hmun a chang zui lo a nih erawh chuan Green Mizoram Day kan hman hi a hlawhtling tluan tling thei dawn lo a ni.

Green Mizoram Day kan hman ruala thil pawimawh leh kan mamawh nia lang chu Zoram mipuite thinlunga thing phun pawimawhna leh thing phun uar kan mamawh tawhzia nghet taka an rilrua tuhsak hi a ṭul hle a, mipui tam berten thingkung hlutna leh kan tana a pawimawhzia an hriatchian loh chhung chuan Green Mizoram Day kan hman ṭhin hi a hlawhtling thei tak tak dawn lova, chuvangin hemi kawnga mipuite rilru hmin tura mi ṭhahnemngai te mai baka, sawrkar leh tlawmngai pawl thlenga kan ṭan tlan a ṭul a ni.