Mizoramin furpui kan thlena kan tawrh ziah chu leimin / leitawlh vanga harsatna thleng hi a ni a, hetianga ruahtui vanga harsatna hi khawvel ram dang te pawhin an tawk ve fo a, amaherawhchu, keini ang ram, ram rethei leh khawpui chhung indin dan ruahmanna fel awm lohna hmun hian kan tuar nasa ṭhin niin a lang.
Ruahtui avanga leimin / leitawlh te hi ṭhenkhat chu khuarel chhiatna ni bawk mahse a tam zawk mah hi chu mihringten kan siamchawpah pawh a puh theih awm e. Leimin kan siamchawp dana langsar tak pahnih chu engemaw atana lei kan laih ṭhin leh tuihawk luanna mumal lo lutuk hi a nih a rinawm.
Lei laih chungchang hi chu tun ṭumah chuan lo dahṭha rih ila, tun hma lam aiin tuihawk hi kan nei tam ta hle mai a, in chung zawl nei kan tam tak vang te, kan inchunga ruahtui tla te mahni in zawn lova paih tum kan tam tak vang te, mahni huan rama tuihawk luan luh theihlohna tura siam kan tam tak vangte-in tun hma aiin tuihawk hi hmun khatah a luang tam ta niin a lang a, heng tuihawk tam tham tak te hi a luan ralna mumal tak kan siam loh avangin tuihawkin kawr a panna kawngah kan ram lei lung a ei hêk nasa ṭhin hle a, hei hian leimin a siam phah fo ṭhin niin a lang.
Hetiang hi a nih avang hian tuihawk luanna mumal tak siam kawngah hian ṭan kan lâk hle a ngai a, tuihawk luanna ṭha kan neih loh chuan leimin hi kan insiamchawp chho zel dawn niin a lang.
Chuvangin, sawrkar thuneitute mai bakah khawtlang hruaitute pawh hian kan theihna chin chinah mahni huam chhungah chuan tuihawk luanna ṭha tam zawk siam tum ila, MGNREGS mai bakah sawrkar aṭanga khawpui tihchangtlunna tur hnathawh tur awmah te tuihawk luanna mumal siam hi ngaih pawimawhah kan neih a ṭul tawh takzet a ni.