Hnathawh viltu tur rawih theih nise

Kan khawpui chhungah hmasawnna hna hrang hrang thawh mek a ni a, chung zingah chuan Field-I-a Auditorium sak hi hman deuh khan Sub-Hqrs. YMA lamin enin, a sakna atana an hmanraw hman a ṭha tawklo nia sawiin, an hmanraw chhawp sa te pawh hmang tawhlo turin a satute an hrilh a, amaherawhchu, vil zui reng a har a, hmanraw ṭha lo nia sawi an chhawpsa te pawh an hman zui leh  hman zui loh hriatzui a ni ta lo niin a lang.

Hmanni-a NECS-in an dinchamphaphak an lawmnaah khan NECS hotupa khan Chhingchhip-a Sainik School sak chu an monitor reng thu a sawi a, NECS hian Sainik School sak mek hi a sak hna a ṭha em? a sak dan tura tih angin an sa em? tih an endik reng a, Sainik School sak hnathawh endik leh vil hi a hranpa-in an thawk a ni.

Mizoram-a hmasawnna hrang hrang thawh mek tam zawk hi a enkawltu Department-in an hnathawh ṭhat leh ṭhat loh endik leh vil hi an kutken a, amaherawhchu mihring indaihlohna avangte-in duhthusamin hnathawh hrang hrang te hi an vil ṭha tawklo fo ṭhin a, tin, Department mi leh sa-in an vil hian hlawh an neih belh loh avangin a viltu tura ruat te pawh hian an vil ṭha peih lo fo bawk. Hei vang hian sum tam tak senga hmasawnna hna thawh te hi a ṭhat tur angin a ṭha tawk lo fo a, hetianga a viltu tura ruatten an vil ṭhat tawk loh vang hian Serchhip-ah ngei pawh YMA hialin an vilpui a nih kha.

Hetiang a nih avang hian Mizorama hmasawnna hnathawh, sum tam tak senna leh rotling tur thil te sak/siam a nih dawn chuan an hnathawh ṭhat leh ṭhat loh endik a, viltu tur hi a hranpaa rawih mai ṭhin ni se, Mizoram-in thil ṭha leh rotling a neihna tur kawngah hian a ṭha zawkin a rinawm. Tuna kan kaldan anga kan kal hi chuan sum tam tak senna, mipuite tana rotling tura siam  tum si hian mipuite lungawilohna leh mipuite tana chhiatna hial thlen theitu tur thil kan siam tam mai mai thei tlat a ni. Chuvangin, Mizoram sawrkar hnuaia hmasawnna hna hrang hrang thawh hi a enkawltu Department mi leh sa te vil tura dah mai lo hian a viltu tur hi a hranpaa rawih ṭhin nise, chutianga rawih tur Firm din chu kan ṭhalai lehkhathiam hna hmulo tam tak tan pawh hna hmuh theihna a la ni thei dawn bawk a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram