Mizoram Pollution Control Board (MPCB)-in The Motor Vehicle Act and Rules anga lirthei kum khat aia upate khû (emission) an tihchhuah tam dan a enfiahna, Vehicular Emission Testing hmangin Aizawl leh Lunglei-ah lirthei khu enfiahna hawn a ni a, Lirthei khû enfiahnaa tlingte chu Pollution Under Control Certificate (PUCC) pek ṭhin an ni ṭhin a ni.
Serchhip-ah lirthei khu endikna hi kalpui a la ni lo a, endiktir turte tan chuan Aizawl emaw, Lunglei-ah emaw an pan a ngai a, hei hi District danga lirthei neitute tan chuan thil harsa tak a ni a, kal remchan paha an endiktir thei a nih loh chuan a hranpaa endiktir tura pan vang vang hi thil harsa leh buaithlak tak a ni a, hei vang hian District danga lirthei tam zawk te hi chuan Pollution Under Control Certificate (PUCC) hi an la nei lo-in a rinawm a, hetihlai hian Serchhip-a lirthei, PUCC nei si lo, Aizawl-a an kal changin MVI lamin an lo phut anga PUCC nei si lo te chuan pawisa an chawi a ngaih phah leh si ṭhin niin sawi a ni.
Lirthei khu endikna hmun Serchhip leh District Hqrs. danga hawn a la nih loh avangin Serchhip mai bakah District danga lirthei neitu ṭhenkhat te pawhin hetiang harsatna an tawk ve ngeiin a rinawm a, lirthei khu endikna hi Aizawl leh Lunglei-ah chauh hawn a nih avangin District dang lirthei te hi chu sawrkar lam pawh hian ngaihnatthiamna a nei thei a nih loh rau rau chuan District Hqrs. tinah hian lirthei khu endikna hmun hi hawng ve law law se a ṭha khawp mai.