Thlai thar a thianghlim ngei tih finfiah dan kawng zawn nise

Serchhipa thlai chingtu inzawmkhawm Serchhip Horticulture & Agriculture Cooperative Society te chuan nimina Assembly an neihah an thlai chin a thianghlim tawk lova sawi awm zauh ṭhin chu sumdawnna leh eizawnna thila inbeihnaah an ngai tih resolution an pass a ni.

Tun hnai chhoah Serchhip-a thlai chinna hmunpui Zawlpui phai aṭanga thlai chinnaah damdawi an hmang ṭhin nia sawi a ni a, hei vang hian mi ṭhenkhat chuan Serchhip thlai thar te an thinhrik deuh hial nia sawi a ni. Hei hi Serchhip-a thlai chingtute pawhin hria-in Assembly-ah hetiang hian resolution an pass bakah an member thlai chingtu tute pawhin thianghlim taka thlai enkawl zui zel nise, thlai hrisel tawk lo leh him tawk lo hralh chhuah loh nise an ti bawk a ni.

Serchhip-a thlai thar chhuah te a thianghlim tawk lo nia sawi chungchangah a chingtuten sawifiahin an infuihna thawm hriattur awm mahse resolution an pass leh an infuihna hian an thlai thar leitu tur mipuite thinlung an hmin thei ang em? Tun hma angin an thlai thar te Zoram mipuiin an inchuh leh nasa thei ang em? tih erawh ngaihtuah tham tak a la ni tho a ni.

Chuvangin, Serchhipa thlai chingtute hian an thlai thar te a thianghlim tawk tih hi anmahni sawi mai ni lovin a thianghlim ngei tih finfiah dan zawng zawk se, anmahni’n a thianghlim tih an sawi ai chuan Laboratory-a a finfiahtuten a thianghlim tih an sawi hi mipuiten an pawm zawk dawn avangin leh an thlai thar hralhna thlengah nghawng ṭha a neih theih dawn avangin hetiang kawng hi zawng se a ṭha khawp mai.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram