Editorial: Hnamdang rikrap leh vau lo zawnga khawsak hi kan tihtur a ni

Nimin khan Sub-Hqrs. YMA chuan thuchhuah an siam a, an thuchhuah siamah chuan ramri buaina avanga kan rama hnamdang awmte (Vai) lo vau leh rikrap lo turin mipuite ngenna an dah tel a, YMA-in hetianga mipuite hnena ngenna an siam hi thil ṭha tak leh lawmawm tak a ni.

Assam nen hian tun hma aṭang tawhin buaina kan nei fo tawh a, tun hma deuh kha chuan hetianga buaina a chhuah châng hian kan rama hnamdang hnathawka awm leh buai laia kan rama tangkhangte rikrap leh kut tawrhtir hialte kan nei ṭhin a, amaherawhchu tun hnu hi chuan hetiang ang thil thleng hi hmuh tur a awm ta mang lo. Chutihlai chuan buaina chhuah avanga thinrim, ngaihtuah tawi deuhte hi mawi lo takin an lo che palh ang tih a hlauhawm a, Sub-Hqrs. YMA-in hetiang thil thleng thei ven nachang an hria hi a finthlak a, zawm pawh a hlawh ngeiin a rinawm.

“Mizoram chu India rama state ralmuang ber a ni” tiin kan sawi ṭhin a, hei hi a dik a, hnamdangte pawhin nuam an ti niin a lang a, hetianga ramri-a buaina a lo thlen chang pawh hian kan rama hnam dang awmte laka mawi lo taka chet lo lak ve chiam ai chuan ralmuang taka awmtir zel hi ram dangte laka kan than mawina tur leh, nakin zel atana kan ṭhatpui tur zawk niin a lang.

Ni tla seng lova roreltu an tih ṭhin, British-in khawvel ram hrang hrang an awp beh theihna thuruka an sawi ‘ṭhen hrang la, awp bet rawh’ (divide and rule) tih ang deuh khan, Mizo hawtute kâra an laka ṭhat kan chhuah vanga Mizote haw ve ngai lo tur kan siam tam hi nakin atan kan la ṭhatpui theih tur zawk niin a lang a, chuvangin, tuna Sub-Hqrs. YMA-in thuchhuah an siam anga hnamdangte rikrap lo zawnga chet hi a fuh a rinawm.

Leave a Reply

This site uses Akismet to reduce spam. Learn how your comment data is processed.