Tunhma aṭanga Mizoten intihhlimna hun atana kan hman ṭhin, Mizo te Kût ropui bera ngaih leh tun thlenga Mizoten kan la hman chhunzawm zel, Chapchar Kut chu naktuk khi a lo ni leh ta a, kum dangah chuan Chapchar Kut hi Mizoram chhung mai bakah Mizoram pawn lama awm Mizote pawhin an awmna hmunah an theih anga ropuiin an hmang ṭhin a, nikum aṭang khan hrileng avangin tun hma Chapchar Kut hman dan ang khan hman theih a ni ta lo a, Aizawlah chuan sawrkar huaihawtin item nei tur leh a buaipuitu mi tam vakloten hmangin TV leh internet kaltlangin an hman dan pek chhuah a ni dawn a ni.
Chapchar Kut hi kan hnam lâm leh zai te, kan nunphung leh incheinate kan pholanna hun ber a ni chho ta a, tunhnai chho aṭangin Chapchar Kût pualin sawrkar office leh zirna inahte pawh Mizo thuam inbelna hunte siam a ni chho ta zel a, a ṭha hle a ni. Chapchar Kut kan lo hman dan ṭhin hian ṭhangthar tam takten kan Mizo hnam lâm leh zai te, Mizo incheina leh nunphungte a takin an hmuin an hmelhriat phah, tam takin an thiam phah bawk a, chuvangin Chapchar Kut hi kan Mizo hnam rohlute chhawm nunna kawnga thil pawimawh tak a ni a, a huhoa hman theih a nih loh lai pawha sawrkarin mipuite chhim theih tura Chapchar Kut hman dan tur a ruahman hi thil ṭha tak a ni.
Kan hnam ziarang leh nunphung kan hlamchhiah chuan kan hnam hian boral a hlat dawn lo tih hria-in, tun hma aṭanga kan lo hman ṭangkai tawh dan angin, Chapchar Kut hi ṭhangtharte hnena kan hnam rohlute hlanchhawnna atan hman tum zel ila, tun aia kan hnam tana a hlut zual zel theih dan turte pawh hi ngaihtuah zel ang u.