Mizoram Governor Hari Babu Kambhampati chuan ṭhalaite zingah sawrkar hnathawh tum tlatna tihnêp a ngai a, entrepreneur huanga an zuan luh duhna tura fuih an ngai a, State hmasawn ni turin ṭhalai tam tak entrepreneur-ah chher tum a ṭul tih thu nimin khan Mizorama SBI hotute a kawmnaah a sawi a ni.
Tuna kan Governor hi Mizorama a rawn awmna a la rei lo a, chutihlai chuan tlawmngai pawl leh kohhran hruaitute a kawmnaah Mizoram hmasawn theihna tur a sawipui nasa hle a, hei hian Mizoram hmasawn theihna atana a rilru a sen nasatzia a tilang chiang hle âwm e.
SBI hotute nena an inkawmnaa Governor-in a sawi pawh hi Mizoramin kan mamawh tak niin a lang a, ṭhalai zingah kum tin HSLC aṭanga master degree nei thar engemawzat an chhuak reng a, heng mite hian sawrkarah an qualification mil tur hna an beisei fur a, hei hi nu leh paten kan fate lehkha kan zirtir chhan ber pawh a ni reng a, chutihlaiin an qualification mila sawrkara hna thawk erawh an tlem hle thung a ni.
Lehkhathiam tam tak chuan sawrkara luh beiseiin an hun tam tak an seng a, an qualification mil tur hna an hmu hlei thei chuang lova, hna ṭha zawk nghah nan tiin hlawh hniam te te-in kum tam tak hna tenau te te an thawk kual a, tam tak chuan sawrkara hna an dil theih tawh loh thlengin sawrkar hna an beisei a, an kum a over meuh chuan an tan eizawnna kawng dang dap leh ngamawm tawh loh khawpa dinhmun chhia-in an awm fo a, an zirnaa an senso leh an thiamnate chu an sum lakluh nena khaikhinin a inthlau hle ṭhin a ni. Chuvangin, ṭhalaite hian lehkha an zir lai aṭangin sawrkara an luh loh pawha mahni kutke-a dinchhuah dan an zir tel a ngai tawh a, a bul ṭan nan chuan nu leh pate an pawimawh a, kan fate lehkha kan zirtir dan kalphung hi kan thlak a ṭul tawh takzet niin a lang.