Thawhlehni khan School of Nursing, Thingdawl, Kolasibah General Nursing and Midwifery (GNM) 2nd Batch zir chhuakte thlahna hun hman a ni a, Lawngtlaiah pawh Auxiliary Nurse Midwife (ANM) School-a 5th batch zirlaite chu tun thla ni 3 khan thlahna hun hman a ni leh tawh bawk a ni.
Health Department-in Nursing Service 2018-2019 main achievement report-a an tarlan danin, sawrkar laipui chuan Siaha, Champhai, Serchhip leh Kolasib-a GNM school dinna atan cheng vbc. 10 ṭheuh a pek bakah Lawngtlai, Mamit leh Aizawl-a ANM School dinna atan cheng vbc. 5 ṭheuh a pek hmangin heng khaw hrang hrangahte hian Nursing School sak a ni a, Kolasib leh Lawngtlaite rualin Serchhipa Nursing School sak pawh Administrative cum Teaching block leh Hostel block sak zawh a ni a, a dang zawngah hian Administrative cum Teaching block-te sak zawh a ni bawk a, Serchhip ruala Hostel block sa zo tel, Lawngtlaiah chuan ni 16 November 2017 khan ANM School kalpui ṭan a ni a, Kolasib Thingdawlah pawh ni 18 December, 2017 khan GNM school kalpui ṭan a ni bawk a ni.
Hetianga zirna sâng hawn belh a nih hian a awmna khua leh a chhehvel mipuite tan awlsamna, hamṭhatna leh hmasawnna tam tak a keng tel a, Nursing School building kan sak zawh rualpui, Lawngtlai leh Kolasib District-te hian an Nursing School a taka an kalpui tawhnaah hian kawng tam takin an ṭhatpuiin hmasawnna an neihpui tawh ngei a rinawm a, Serchhipa Nursing School building kan neih ve pawh hi hma kan sawnpuina tur chuan a nihna tur anga kalpui thuai hi thil ṭul a ni a, hemi tur hian khawtlang hruaitute leh mipuiten hma kan lak a ṭul a, a taka kalpui a nih thuai loh chuan a building hi thuam ṭhat harsa khawpa a rawih chhiat maite pawh thil hlauhawm tak a ni.