Kumina YMA Day chu kan hmang liam leh ta a, kumin hi YMA Day vawi 87-na a ni ta a, kum heti chen Mizo hnam inghahna pawl lian leh ropui tak a ni reng thei hi thil lawmawm tak a ni.
Khawvelah hian pawl hrang hrang hi a tam hle a, khawvel pum huapa inzar pharh pawh an awm nual a, heng zingah hian hnam pakhat tana innghahna tlak pawl, YMA anga ropui leh nghet hi a awm bik kher awm lo e.
Kum 87 chhung zet chak tak leh nghet taka a la kal zel thei hi thil lawmawm tak a ni a, Mizo hnam hrang hrangte min suihkhawmtu, miharsa te tuamhlawmtu, lusun khawharte thlamuantu, ṭanpui ngaite ṭanpuitu a nih ṭhinna chhan hi tun thlenga nghet taka a la din theihna chhan pakhat a nih a rinawm.
Mi ṭhenkhatte phei chuan YMA hi Pathianin Mizote tan thil hlu tak min pek a ni an ti ṭhin a, YMA hnathawh tawh ṭhin tam takte en hian hei hi a pawmawm hle a ni.
Hetihlai hian tun hnaiah Central YMA hmalakna leh rorel danah fuh lo leh diklo deuh a awm nia an hriat avangin mi ṭhenkhat chuan YMA an dem nasa hle a, hmun ṭhenkhatah pawh YMA member ni duh lote pawh awm tawk an awm ve ta nawk mai. Hetihlai hian kawng tam takah YMA hi Mizo hnamin kan la ṭangkaipuiin, kan hnam himna leh ram hmasawnna kawngah kan la ṭangkaipui viau thung a ni.
Sawi tawh angin kum 87 zet YMA nghet taka a din theihna chhan hi Mizo mipuite tan hlutna a neih vang leh Mizo mipuite mamawh a thawhsak ṭhin vang a ni a, nghet taka YMA a kal zel a, pawl ropui tak a nih reng theihna tur chuan Mizo mipuite tana YMA hlutna hi kan siam thar a, kan siam belh zel a ṭul a, chumi tur chuan Mizo hnam leh ram mamawh phuhrutu leh thawhsaktuah YMA hi a ṭan zel a ngai dawn a ni.