Zothlifim Logo
Loading ...

Kumin Independence Day kan hman zawh taka mipui tam takte sawi hlawh zui pakhat chu Parade-a tel school naupang ding tluan thei lova hruai chhuah tam lutuk chungchang kha a niawm e.

Kumdangah pawh National Day hmannaa zirlai parade zingah tlu leh ding tluan thei lova hruai chhuah an awm nual thin a, hei hi Serchhipah chauh pawh ni lovin, Mizoram hmun hrang hrangah tun hma lam aiin a nasa telh telh niin a lang a, hemi chungchang hi ngaihtuah zui tul tak niin a lang.

Hetianga parade laia zirlai luhai vanga tlu leh ding tluan thei lova lak chhuah ngai hi tun hma deuh kha chuan hetiang em em hian a nasa ngai lo a, tunah hian hetiang hi an pung chho niin a lang a, he thil thlen chhan hi rin thu chuan puh tur tam tak a awm theiin a rinawm.

National Day-ah hian khuallianten sawrkar department hmalakna leh hlawhtlinna hrang hrang sawi chhuahna hunah an hmang thin a, sawrkar department thenkhat hmalakna sawi laia department thenkhat hmalakna sawilansak lohte kha an tan thil nuam lo leh, thil fuh tawk lo a awm thei a, hei vang hian khualliante hian rei tak tak thu an sawi a ngaih phah thin a, chuvangin, zirlaite hi nisa hnuaiah rei tak an ding thin a ni. Zirlaite hriselna dinhmunte a inchen loh avangin zirlai tam takin hei hi an tawrh phah niin a lang a, hei hian zirlaite taksa bakah an rilru thlenga nghawng tha lo zawk a neih phah theih avangin he harsatna sutkian dan hi zawn thuai a tul takzet a. Hetiang a hluar nachhan zawn chhuah hi a harsa deuha ngaih a nih pawhin, parade-a zirlai tel turte hriselna endik hmasak emaw, parade dan kalphung tihdanglam thlenga hmalak theih nise a tha-in a rinawm.